عه‌بدولمه‌هدی: ئیراق نابیته پشكه‌ك ژ سزایێن ئه‌مریكا ل سه‌ر ئیرانێ
سه‌رۆكوه‌زیرێن ئیراقێ ب سه‌ره‌دانه‌كا فه‌رمی ل ئیرانێ یه و دگه‌ل سه‌رۆكێ وی وه‌لاتی ئالۆزیێن ده‌ڤه‌رێ گۆتوبێژ كرن.
عادل عه‌بدولمه‌هدی ب سه‌رۆكاتییا شانده‌كێ وه‌زاری سه‌ره‌دانا ئیرانێ كرییه و دوهی ل ته‌هرانێ دگه‌ل حه‌سه‌ن رۆحانی سه‌رۆكێ وی وه‌لاتی كۆمبوو، ئالۆزیێن ده‌ڤه‌رێ و په‌یوه‌ندیێن به‌غدا و ته‌هرانێ گۆتوبێژ كرن.
حه‌سه‌ن رۆحانی دیاركر، ئێمناهییا ده‌ڤه‌رێ ژبۆ ئیرانێ پرسه‌كا گه‌له‌ك گرنگه و گۆت: ئیران ده‌ستپێشخه‌را چ شه‌ره‌كی نابیت و د شیان دایه، ئالۆزی ب دیالۆگێ بهێن چاره‌كرن.
رۆحانی هەروەسا دوپات کرییە، ئیران پارێزەرا رێیێن ئاڤێ یە ل کەنداڤی و هەروەسا تەنگئاڤا هورمز و کەنداڤێ عومانێ.
ژ ئالیێ خوه‌ڤه، عادل عه‌بدولمه‌هدی دوپات كر، ئیراق نابیته پشكه‌ك ژ وان سزایێن ئه‌مریكا ل سه‌ر ئیرانێ سه‌پاندین.
شاندا ئیراقی بۆ ته‌هرانێ هه‌ر یه‌ك ژ وه‌زیرێن دارایی، په‌ترۆل، به‌رگری و ڤه‌گوهاستنێ و هه‌روه‌ها شیره‌تكارێ ئاساییشا نشتیمانییا ئیراقێ بخوه‌ڤه دگریت.
