زاخو: نڤیسینگه‌ها كومه‌لایه‌تى دوماهى ب كێشه‌كا جڤاكى ئینات
محه‌مه‌دسدیق
دچارچووڤێ به‌رنامێ نڤیسینگه‌ها كومه‌لایه‌تیا لقێ هه‌شت یا پارتى دیموكراتى كوردستاندا ژبو چاره‌كرنا كێشێن جڤاكى ل ده‌ڤه‌رێ، ئه‌ڤرو ب ئاماده‌بوونا ژماره‌كا كارگێرێن لقێ هه‌شت و هه‌ردوو بنه‌مالێن خودان كێشا جڤاكى و هند ژ رهسپى و كه‌سایه‌تیێن ده‌ڤه‌رێ، (عه‌بدوللا بشار) كارگێرێ لقێ هه‌شت و به‌رپرسێ نڤیسینگه‌ها كومه‌لایه‌تى رێوره‌سمێن لێكخوه‌شبوونێ دناڤبه‌را بنه‌مالا عزه‌ت سادق گویى و هه‌روه‌سا بنه‌مالا محه‌مه‌د عه‌بدولره‌حمان سلێڤانه‌یى دا برێڤه‌بر، د روینشتنا خوه‌دا عه‌بدوللا بشار ئاماژه‌یه‌ك ب هه‌ول و بزاڤێن پارتى كرن ژبو چاره‌كرنا كێشێن جڤاكى ل ده‌ڤه‌رێ و دوپاتى ژى ل ده‌ستپێشخه‌رییا هه‌ردوو لایان كر كو كێشا پێشى پێنج سالان چاره بكه‌ن، د ئه‌نجامدا هه‌ردوو بنه‌مال ل ئێك خوه‌شبین و ئێمزا ل سه‌ر ناڤێن خوه كرن كو ئێدى ده‌رگه‌هێ كه‌ربێ بگرن و ده‌رگه‌هێ لێبورین و لێكخوه‌شبوونێ ڤه‌كه‌ن، به‌رامبه‌ر كو لایێ ئێكێ ب كوژمه‌كى پاره‌یى لایێ دووێ دلخوه‌ش بكه‌ت. دهێته زانین ل سالا دوو هه‌زار و پازدێ ل توركیا ئه‌ڤ كێشه دناڤبه‌را دوو گه‌نجاندا روى دابوو، د ئه‌نجامدا گه‌نجه‌ك بناڤێ زێره‌ڤان سادق گویى دهێته كوشتن، پشتى لایێ دووێ په‌نا بو به‌رپرسێ نڤیسینگه‌ها كومه‌لایه‌تیا لقێ هه‌شت عه‌بدوللا بشار برى و وان ژى بزاڤ بو چاره‌كرنا ڤێ كێشێ كرن و ئه‌ڤرو دوماهى پێ ئینان
