شانده‌كا هه‌رێما كوردستانێ دێ سه‌ره‌دانا به‌غدا كه‌ت
چاڤه‌رێ دهێت كرن شانده‌كا حكومه‌تا هه‌رێما كوردستانێ ل ڤێ حه‌فتیێ سه‌ره‌دانا به‌غدایێ بكه‌ت و به‌رده‌وامیێ بده‌ته گۆتوبێژن بودجه‌ی و په‌ترۆلێ.
د. به‌شیر حه‌داد جێگرێ دوێ یێ سه‌رۆكێ په‌رله‌مانێ ئیراقێ بو وار راگه‌هاند، شانده‌كا حكومه‌تا هه‌رێما كوردستانێ ل ڤێ حه‌فتیێ دێ سه‌ره‌دانا به‌غدا پایته‌ختا ئیراقێ كه‌ت داكو به‌رده‌وامیێ بده‌ته گۆتوبێژێن چاره‌كرنا كێشه‌یێن هه‌لاویستی، ژ وان دۆسێن په‌ترۆلێ و یێن دارایی.
گۆت ژی: لژنه‌یێن هه‌ڤپشك ل ناڤبه‌را هه‌ولێر و به‌غدایێ هاتینه پێكئینان و سه‌ره‌دانێن دو ئالی دێ د به‌رده‌وام بن تا پرۆژه‌یا بودجه‌یا سالا 2020ێ دهێت به‌رهه‌ڤ كرن.
ل گۆری زانیاریێن وار، سه‌ره‌دانا شاندێ حكومه‌تا هه‌رێما كوردستانێ بۆ به‌غدایێ دێ ل ناڤه‌راستا ئه‌ڤێ حه‌فتیێ هێت كرن.
ل حه‌فتییا بۆری شانده‌كا بلند یا حكومه‌تا ئیراقێ سه‌ره‌دانا هه‌ولێرێ كر و دگه‌ل سه‌رۆكێ هه‌رێما كوردستانێ و سه‌رۆك وه‌زیرێن هه‌رێمێ كۆمبوو، دۆسیێن په‌ترۆلێ و یێن دارایی و هه‌روه‌ها ئێمناهییا ده‌ڤه‌رێن كوردستانی هاتن گۆتوبێژ كرن و بریار دان لژنه‌یێن هه‌ڤپشك بهێن پێكئینان.
د كۆمبوونا شاندا به‌غدایێ دا دگه‌ل مه‌سروور بارزانی، هاتبوو راگه‌هاند كو ل ڤێ حه‌فتیێ گۆتوبێژێن لژنه‌یان دێ ده‌ستپێكه‌ت.
دگه‌ل ده‌ستبكاربوونا كابینه‌یا نه‌هێ یا حكومه‌تا هه‌رێمێ، مه‌سروور بارزانی سه‌رۆكێ وه‌زیران ل شازده‌ی ڤێ مه‌هێ سه‌ره‌دانا به‌غدا كربوون و دگه‌ل هه‌رسێ سه‌رۆكاتییان كۆمببوو، ئه‌و سه‌ره‌دان ژی ژبۆ نیشاندانا نیازپاكییا هه‌رێمێ بوو، ژبۆ چاره‌كرنا كێشه‌یان.
