سه‌روك مه‌سعود بارزانى بهه‌لكه‌فتا سالڤه‌گه‌را ئه‌نفالكرنا بارزانیان، په‌یامه‌ك به‌لاڤكر
محه‌مه‌د سه‌دیق
سه‌روك مه‌سعود بارزانى بهه‌لكه‌فتا سالڤه‌گه‌را ئه‌نفالكرنا بارزانیان، په‌یامه‌ك به‌لاڤكر و تێدا راگه‌هاند، كێشه‌یا سه‌ره‌كى یا گه‌لێ كوردستانێ ل عیراقێ هزرا شوڤینى و ئه‌نفالچیایه، و ئه‌ڤه ژى ده‌قێ په‌یاما سه‌روك بارزانى یه، بناڤێ خودایێ مه‌زن و دلوڤان
ئه‌ڤرو بیره‌وه‌رییا رۆژه‌كا تارییه د مێژوویا گه‌لێ مه‌دا، به‌رى سیهـ و شه‌ش سالان رژێما به‌عس ب شێوه‌یه‌كێ درندانه هه‌شت هه‌زار زه‌لامێن پیر و گه‌نج یێن بارزانى، هه‌ر ژ ژیێ نه‌هـ سالى تا ب ناڤسالڤه‌چوویێن نوت سالى، راپێچى بیابانێن باشوورێ عیراقێ كر و ب شێوه‌یه‌كێ نه‌مرۆڤانه كومه‌لكوژ كرن، ئه‌و تاوانه ئه‌لقه‌یه‌ك بوو ژ وان زنجیره كاره‌سات و قوربانیێن ب سه‌ر روله‌یێن گه‌لێ كوردستانێ دا هاتین، هه‌ر ژ بێ سه‌ر و شوینكرنا دوازده هزار گه‌نجێن فه‌یلى و ئه‌نفالێن گه‌رمیان و كێمیا بارانكرنا هه‌له‌بجه بگره هه‌تا ته‌عریب و راگواستن و په‌لامارا تیروریستان و تاوانان ل دژى خوشك و برایێن مه یێن ئێزدى، ئه‌گه‌ر چى ب درێژاهییا مێژوویا خه‌باتا رزگاریخوازى یا گه‌لێ مه، ته‌مامیا گه‌لێ مه توشى كاره‌سات و نه‌هامه‌تیێ بووینه، به‌لێ دۆژمنى ب تایبه‌ت ركه‌كا زۆر به‌رامبه‌ر بارزان هه‌بوو، وه‌ك مه‌لبه‌ندێ شورش و به‌رپه‌رچدانا داگیركارى و كانییا رێبازا سه‌ربخوه‌خوازییێ ژێ ترساینه، دوژمنى هه‌شت هه‌زار بارزانى ئه‌نفالكرن، به‌لێ نه‌بتنێ نه‌شییا وێ رێبازێ بشكێنیت به‌لكو تا نها ژى ئه‌و رێبازه نوێنه‌راتییا كوردایه‌تیێ دكه‌ت، ب داخڤه، د ده‌مه‌كێ دا سیهـ و شه‌ش سال ب سه‌ر وێ تاوانا مه‌زندا ده‌ربازبوون، نها ژى د ناڤبه‌ینان دا ره‌نگڤه‌دانا هزرا شوفینى و ئه‌نفالچییان د هه‌لسوكه‌وت و ره‌فتارێن هنده‌ك كه‌س و لایه‌ناندا دبینن، كو ئه‌و كێشه‌یا سه‌ره‌كى یا مه بوویه دگه‌ل حكومه‌تێن ئیك لدویف ئێك یێن به‌غدا، د بیره‌وه‌رییا ئه‌نفالێن بارزانییان دا، د خوازم ته‌كه‌ز بكه‌مه‌ڤه بتنێ بۆ بیرئینانا ئازارێن وان نینه، بۆ وێ ئێكێ یه هه‌مى شیانێن خوه بو ریشه‌كێشكرنا وێ هزرا ئه‌م ئه‌نفالكرین بخه‌ینه گه‌ر، داكو ویژدانا جڤاكێ نێڤده‌وله‌تى ب خه‌به‌ر بێت و دده‌مه‌كێ دا ئه‌م ژ نوى گورێن ب كومه‌ل یێن عه‌زیزێن خوه ل بیابانێن عیراقێ د بینین، شه‌رم ژ گه‌لێ مه بكه‌ن و بزانن ژى زولمه‌ك لمه كرینه و ئه‌و بێده‌نگ بوون
بژى كوردستان
نه‌مرى بۆ شه‌هیدێن رێكا رزگارییا ئازادیێ
مه‌سعود بارزانى
٣١/٧/٢٠١٩
