شانده‌كا وه‌زاره‌تا پێشمه‌رگه‌ی دێ سه‌ره‌دانا به‌غدایێ که‌ت
وه‌ها بریاره ل ڤان دو رۆژان شانده‌كا وه‌زاره‌تا پێشمه‌رگه‌ی سه‌ره‌دانا به‌غدایێ بكه‌ت، ژبۆ گۆتوبێژ كرنا چه‌ندین دۆسیێن گرنگ.
ل گۆری زانیاریێن ژ وه‌زاره‌تا پێشمه‌رگه‌ی وه‌رگرتین، شانده‌كا ئاست بلند یا وه‌زاره‌تا پێشمه‌رگه‌ی ل به‌ره سه‌ره‌دانا به‌غدایێ بكه‌ت و دگه‌ل وه‌زاره‌تا به‌رگرییا ئیراقێ چه‌ندین كۆمبوونان ساز بكه‌ت، لێ هێشتا بریار نه‌هاتییه دان، ئه‌و سه‌ره‌دان دێ ل چ رۆژه‌كا ڤێ حه‌فتیێ هێت كرن.
زانیاری ئاماژه دكه‌ن، شاندا وه‌زاره‌تا پێشمه‌رگه‌ی دێ دۆسیێن مووچه‌یێن پێشمه‌رگه‌ی، دوباره پێكئینانا ژوورا ئۆپه‌راسیۆنێن هه‌ڤپشك بۆ ده‌ڤه‌رێن كوردستانی گۆتوبێژ كه‌ت.
هه‌روه‌ها پرسا هه‌ماهه‌نگییا سوپایێ ئیراقێ و پێشمه‌رگێ كوردستانێ ژبۆ به‌رهنگاربوونا شانه‌یێن ڤه‌شارتی یێن داعشێ ژی دێ د كۆمبوونان دا هێت باس كرن.
د رۆژا ئێكێ یا جه‌ژنا قوربانی دا، شۆره‌ش ئیسماعیل، وه‌زیرێ پێشمه‌رگه‌ی د سه‌ره‌دانا خوه یا سه‌نگه‌ران دا دیاركربوو، شانده‌كا سه‌ربازییا هه‌رێمێ دێ سه‌ره‌دانا به‌غدایێ كه‌ت و گۆتوبێژێن دگه‌ل وه‌زاره‌تا به‌رگریێ ده‌ست پێ كه‌ن.
