لژنه‌یا پێداچوونا پرۆژه‌قانوونا چاكسازییێ هات پێكئینان
جڤاتا وه‌زیرێن هه‌رێما كوردستانێ لژنا پێداچوونا پرۆژه‌قانوونا چاكسازییا مووچه و خانه‌نشینان پێكئینا و دێ د ده‌مێ مه‌هه‌كێ دا پرۆژه‌یى ته‌مام كه‌ت.
ل گۆره‌ی نڤیساره‌كا فه‌رمی یا جڤاتا وه‌زیران، كو ئیمزایا مه‌سروور بارزانی سه‌رۆكێ حكومه‌تا هه‌رێمێ ل سه‌ره، لژنه‌یه‌ك ژ نه‌هـ وه‌زاره‌ت، ده‌سته و ئالییێن فه‌رمی ب سه‌رۆكاتییا وه‌زیرێ داد یێ حكومه‌تا هه‌رێمێ، ژبۆ پێداچوونێ د پرۆژه‌قانوونا چاكسازییا مووچه و خانه‌نشین و ده‌رماله‌یان دا هاتییه پێكئینان.
ئه‌ركێ لژنه‌یا ناڤهاتی دێ پێداچوون بیت د پرۆژه‌قانوونێ دا ب هه‌ماهه‌نگی دگه‌ل سه‌رۆكاتییا په‌رله‌مانێ كوردستانێ، دا كو ل گۆره‌ی هێلێن گشتی یێن حكومه‌تا هه‌رێمێ دوباره بهێت دارێشتن.
لژنه‌یا جڤاتا وه‌زیران بۆ پرۆژه‌یا چاكسازییێ، هه‌ر یه‌ك ژ وه‌زیرێن دارایی، پلاندانان، وه‌زیرا هه‌رێمێ بۆ كارێن په‌رله‌مانی، هه‌روه‌ها سه‌رۆكێن دیوانا جڤاتا وه‌زیران، دیوانا چاڤدێرییا دارایی، سه‌رۆكێ ده‌سته‌یا ده‌ستپاكیێ و چه‌ندین ئالییێن دی پێكهاتییه.
پرۆژه‌یا چاكسازییا مووچه‌ی و خانه‌نشینان د خولا چارێ یا په‌رله‌مانی دا هاتبوو په‌سه‌ند كرن، لێ ژبه‌ر نه‌رازیبوونا خه‌لكی و هنده‌ك فراكسیۆنان هات راگرتن، دگه‌ل په‌سه‌ندكرنا وی ژی، مه‌هانه دێ سه‌د و پێنجی ملیار دینار بۆ حكومه‌تێ زڤڕن.
