سەرۆکاتییا ھەرێمێ داخواز ژ بەغدا کر کەسوکارێن ئەنفالکرییان قەرەبوو بکەت
سەرۆکاتییا ھەرێما کوردستانێ ئەڤرۆ د بیرەوەرییا دەربازبوونا سیھـ و ئێک سالان دا ل سەر ھەوا ئەنفالێن بەھدینان، داخواز ژ حکومەتا ئیراقێ کر، قوربانییان قەرەبوو بکەت.
سەرۆکاتییا ھەرێما کوردستانێ ئەڤرۆ د بەیانەکێ دا کو د سالڤەگەرا سیھـ و ئێکێ یا ئەنفالکرنا بەھدینان دا بەلاڤکرییە، دایە زانین، د ڤێ یادا خەمگین دا ئەو شەھیدێن ھەوا ئەنفالا بەھدینان و تەڤاھییا شەھیدێن کوردستانێ ل بیر دئین.
سەرۆکاتییا ھەرێمێ د ڤێ بیروەریێ دا، داخواز ژ حکومەتا فیدرال کرییە، ئەرکێ خوە یێ ئەخلاقی بجھـ بینیت و ئەنفالێ ب جینۆساید بناسینیت، ھەروەھا کەسوکارێن قوربانیێن ئەنفالێ قەرەبوو بکەت.
سەرۆکاتییا ھەرێما کوردستانێ دوپات ژی کرییە، ئەو دێ حکومەتا ھەرێمێ ژی راسپێرن کو خزمەتێن زێدەتر بۆ کەسوکارێن ئەنفالکرییان بکەت، ھەروەھا دووڤچوونا چارەنڤیسا ئەنفالبوویان بکەت.
ل بیست و پێنجی تەباخا سالا ھزار و نەھـ سەد و ھەشتێ و ھەشتێ، ھەوا ئەنفالا بەھدینان ل سەر دەستێ رژێما بەعس دەست پێ کربوو و تا شەشی ئیلۆنێ بەردەوام کر، د وی ماوەی دا، گوندێن بەھدینان تووشی کێمیا باران، کوشتن، راگوھاستن، ئاوارە و ھەموو جۆرە نەھامەتییەکێ ھاتن.
