مه‌سروور بارزانى: په‌یوه‌ندییێن ل گه‌ل به‌غدا به‌ره‌ڤ ئاراسته‌یه‌كێ دروست دچن
سه‌رۆكێ حكومه‌تا هه‌رێما كوردستانێ راگه‌هاند: دانوستاندنێن هه‌ولێر و به‌غدایێ به‌رده‌وامن و به‌ره‌ڤ ئاراسته‌یه‌كێ دروست دچن.
مه‌سروور بارزانى، سه‌رۆكێ حكومه‌تا هه‌رێمێ ئه‌ڤرۆ ل هه‌ولێرێ پێشوازى ل جۆن ویلیكس، بالیۆزێ بریتانیا یێ ئیراقێ و شاندا ل گه‌ل كر و بالیۆز جۆنى، پشته‌ڤانییا وه‌لاتێ خوه بۆ حكومه‌تا هه‌رێما كوردستانێ نیشاندا و راگه‌هاند: له‌نده‌ن ب پێشڤه‌چوونا په‌یوه‌ندیێن هه‌ولێر و به‌غدایێ و گه‌شه‌كرنا به‌رده‌وام یا هه‌رێمێ خوه‌شحاله و دێ پشته‌ڤانییا وه‌به‌رهێنه‌رێن بریتانى كه‌ن، كو ل هه‌رێمێ كار بكه‌ن.
سه‌رۆكوه‌زیر بارزانى ژى، دوپاتى ل چاره‌كرنا هه‌موو كێشه‌یێن هه‌ولێر و به‌غدایێ ب رێیا دانوستاندنان ل گۆره‌ى ده‌ستوورى كر و راگه‌هاند: دانوستاندنێن ل گه‌ل به‌غدا به‌ره‌ڤ ئاراسته‌یه‌كێ دروست دچن.
هه‌روه‌ها مه‌سروور بارزانى، باس ل بله‌زكرنا گاڤێن وه‌رگرتنا ڤیزه‌یا بریتانیا بۆ وه‌لاتیێن هه‌رێمێ كر و بالیۆزێ بریتانیا ژى سۆزدا، ئێدى رێكارێن دانا ڤیزێ بۆ وه‌لاتیێن هه‌رێما كوردستانێ و ئیراقێ بله‌زتر بكه‌ت.
ل دوماهییا كۆمبوونێ ژى، هه‌ردو ئالییان دوپاتى ل هه‌ماهه‌نگییا سه‌ربازى و ئێمناهیێ بۆ ژناڤبرنا گه‌فا داعشێ ل سه‌رانسه‌رى ئیراقێ كر.
