پارتى و گۆڕان: كابینه‌یا نه‌هێ دێ هه‌موو كێشه‌یێن هه‌لاویستى چاره‌كه‌ت
پارتییا دیموكرات یا كوردستانێ و ته‌ڤگه‌را گۆڕان ل سه‌ر ئاستێن بلند ل پیرمام كۆمبوون و د كۆنگره‌یه‌كێ رۆژنامه‌ڤانى دا راگه‌هاندن: كابینه‌یا نه‌هێ دێ بهێزترین كابینه‌یا هه‌رێمێ بیت و هه‌موو كێشه‌یێن هه‌لاویستى چاره‌كه‌ت.
په‌یامنێری وار ل هه‌ولێرێ راگه‌هاند: ئه‌ڤرۆ سعه‌ت 11ى سپێدێ، شاندا بلند یا گۆڕانێ ب سه‌رۆكاتییا عومه‌رێ سه‌ید عه‌لى، رێكخه‌رێ گشتى گه‌هشت باره‌گه‌هێ مه‌كته‌با سیاسى یا پارتى و ل گه‌ل شاندا پارتى یا ب سه‌رۆكاتییا فازل میرانى، سكرتێرێ مه‌كته‌با سیاسى كۆمبوون.
پاشان د كۆنگره‌یه‌كێ رۆژنامه‌ڤانى دا، مه‌حموود محه‌مه‌د، په‌یڤدارێ پارتى و ئاراس وه‌لى، ئه‌ندامێ شاندا گۆڕانێ، ناڤه‌رۆكا كۆمبوونێ ئاشكراكر و راگه‌هاندن، كۆمبوون ل دۆر پرسا كه‌ركووكێ و په‌یوه‌ندیێن هه‌ولێر و به‌غدا و بجهئینانا رێككه‌فتنا سیاسى یا پێكئینانا حكومه‌تێ بوو.
دان زانین ژى: هه‌موو ئالیێن پشكدار پشته‌ڤانێن بهێز یێن حكومه‌تێ نه و كابینه‌یا نه‌هێ دێ بهێزترین كابینه‌یا هه‌رێمێ بیت و هه‌موو كێشه‌یێن هه‌لاویستى چاره‌كه‌ت.
ئه‌ڤه د ده‌مه‌كى دا یه، پارتى و گۆڕانێ ل هه‌ژده‌ى شۆباتا ئه‌ڤساله، رێككه‌فتنا پێكئینانا حكومه‌تێ ئیمزاكر و ل گۆره‌ى رێككه‌فتنێ، وه‌ك ئێكه‌م گاڤ فراكسیۆنێن هه‌ردو ئالییان یێن په‌رله‌مانى، دێ ده‌ست ب ده‌ربازكرنا پرۆژێ چاكسازییان و نڤیسینا ده‌ستوورێ هه‌رێمێ و ژماره‌یه‌كا پرۆژه‌یێن دى كه‌ن.
