سه‌رۆك بارزانى: پشته‌ڤانییێ ل دانوستاندنێن هه‌ولێر و به‌غدایێ دكه‌م
سه‌رۆك مه‌سعوود بارزانى ل پیرمام ل گه‌ل شانده‌كا ئه‌مریكى كۆم بوو و راگه‌هاند: ب ته‌مامى پشته‌ڤانییێ ل دانوستاندنێن هه‌ولێر و به‌غدایێ بۆ چاره‌كرنا هه‌موو كیشه‌یان دكه‌ت.
سه‌رۆك مه‌سعوود بارزانى ئه‌ڤرۆ ل پیرمام پێشوازى ل شانده‌كا سیاسى یا ئه‌مریكى ب سه‌رۆكاتییا برایان مه‌كفیتێرز، جێگرێ هنارتییێ سه‌رۆكێ ئه‌مریكا ل ئیراقێ كر و گۆتوبیژا ره‌وشا سیاسى و سه‌ربازى یا ده‌ڤه‌رێ و كێشه‌یێن ده‌ڤه‌رێن سه‌د و چل كر و سه‌رۆكێ شاندا ئه‌مریكى، رۆلێ سه‌رۆك بارزانى د پرۆسه‌یا سیاسى دا بلند نرخاند و راگه‌هاند: ئه‌و هاتینه گۆهدارییا بۆچوونێن سه‌رۆك بارزانى ل دۆر پرۆسه‌یا سیاسى یا ئیراقێ و ده‌ڤه‌رێ بكه‌ن.
سه‌رۆك بارزانى ژى ب درێژاهى باسێ پرۆسه‌یا سیاسى یا ئیراقێ كر و جاره‌كا دى، پشته‌ڤانییا خوه یا ته‌مام بۆ چاره‌كرنا هه‌موو كێشه‌یان ل گۆره‌ى ده‌ستوورى راگه‌هاند و ئاماژه ب مه‌ترسیا سه‌رهلدانا داعشێ ژى دا و گۆت: ئه‌گه‌رێن داعش چێكرى نه‌هاتینه چاره‌كرن و نها تیرۆر گه‌فه‌كا رژده ل سه‌ر ده‌ڤه‌رێ.
ل دۆر ره‌وشا سووریا ژى، سه‌رۆك بارزانى دلگرانییا خوه ژ پاشه‌رۆژا گه‌لێ كورد ل سووریا گه‌هاند شاندا ئه‌مریكى.
