هونه‌رمه‌ند ئه‌نوه‌ر شێخانی وه‌غه‌را داویێ كر
هونه‌رمه‌ندێ كورد ئه‌نوه‌ر شێخانی ئه‌ڤرۆ سپێدێ وه‌غه‌را داویێ كری، پشتی شه‌ره‌كێ درێژ دگه‌ل نه‌خۆشیا په‌نجه‌شێرێ كری، سه‌رۆك بارزانی ژی د په‌یامه‌كێ دا، ژده‌ستدانا وی ب زیانه‌كه مه‌زن وه‌سفكر.
هۆنه‌رمه‌ند ئه‌نوه‌ر شێخانی كو ل ڤان سالێن داویێ تووشێ نه‌خۆشیا په‌نجه‌شێرێ ببوو، ئه‌ڤرۆ سپێدێ د ته‌مه‌نێ 68 سالیێ دا وه‌غه‌را داویێ كر.
ئه‌نوه‌ر شێخانی ل ده‌مێ بۆری، تووشی په‌نجه‌شێرێ ببوو و ژبۆ وه‌رگرتنا چاره‌سه‌ریێ بۆ ده‌رڤه‌ی وه‌لاتی هاتبوو هنارتن.
هه‌ر ئه‌ڤرۆ سه‌رۆك مه‌سعوود بارزانی د په‌یامه‌كێ دا سه‌ره‌خوه‌شی ل مالباتا هونه‌رمه‌ند ئه‌نوه‌ر شێخانی كرن و گۆت: ژده‌ستدانا وی زیانه‌كه مه‌زنه.
ئه‌نوه‌ر شێخانی نێزێكی 50 سالان خزمه‌تا هونه‌ری د وارێ شانۆ، دراما و سینه‌ما كوردی دا كریه و ب هونه‌رمه‌ندێ رۆژێن زه‌حمه‌ت یێن خه‌باتا چیایی دهێته هه‌ژمارتن.
هونه‌رمه‌ند ئه‌نوه‌ر شێخانی ل سالا 1970 یێ ده‌ست ب هونه‌ری كریه، ژبه‌ر هه‌لوه‌ستێن وی یێن سیاسی و كارێن وی یێن رێكخستنێ دگه‌ل پارتا دیمۆكراتا كوردستانێ، هاتبوو زیندان كرن و راگوهاستن، پێشمه‌رگه بوویه و ب دامه‌زرێنه‌رێ كۆمه‌لا هونه‌رمه‌ندێ كوردستانێ یا هه‌ولێرێ دهێت هه‌ژمارتن.
