په‌رله‌مان دێ خواندنا دویێ بۆ راستڤەکرنا پەیرەوێ ناڤخوە كه‌ت
بریاره سوبه‌پەرلەمانێ کوردستانێ کۆم ببیت و بیر ل سالرۆژا رێفراندۆما سەرخوەبوونا کوردستانێ بینیت.
ل گۆرەی راگەھاندنەکا سەرۆکاتییا پەرلەمانێ کوردستانێ، سوبه رۆژا چوارشەمبی رێککەفتی 25ی ئیلۆنێ دێ په‌رله‌مان کۆم بیت، تێدا سەرۆکا پەرلەمانێ کوردستانێ دێ پەیڤەکێ ل دور بیرئانینا سالرۆژا رێفراندۆما سەرخوەبوونا کوردستانێ خۆینیت، کو ل 25ی ئیلۆنا سالا 2017 ل ھەرێما کوردستانێ و ھەموو دەڤەرێن كوردستانى ھاتبوو کرن.
ھەر د روونشتنا خوە دا، په‌رله‌مان دێ خواندنا دویێ بۆ راستڤەکرنا ئێکێ یا پەیرەوێ ناڤخوە یێ پەرلەمانێ کوردستانێ كه‌ت.
وه‌رزێ نوو یێ یاسادانانا په‌رله‌مانێ كوردستانێ ده‌ستپێ كرییه و چاڤه‌رێیه د چه‌ند رۆژێن بهێن دا، حكومه‌ت پرۆژه‌یێ چاكسازییا مووچه و خانه‌نشینییێ بهنێریته په‌ڕله‌مانى و وه‌ك لژنه‌یا قانوونى یا په‌ڕله‌مانى ژى دیاركرى، گرنگترین كارێ په‌رله‌مانى د ڤى وه‌رزى دا، دێ نڤیسینا پرۆژه‌ده‌ستوورێ هه‌رێمێ و ده‌ربازكرنا پرۆژێ چاكسازییێ بیت.
