پارتی ب دژواری به‌رسڤا حه‌شدا شه‌عبی ل که‌رکووکێ دا

پارتی ب دژواری به‌رسڤا حه‌شدا شه‌عبی ل که‌رکووکێ دا و راگه‌هاند: پێخه‌مه‌ت په‌یوه‌ندییێن ئه‌رێنی یێن هه‌ولێر و به‌غدا، پارتی خوه‌ ل هه‌مبه‌ر ره‌وشا که‌رکووکێ بێده‌نگ کرییه‌.
که‌مال که‌رکووکی، سه‌رۆکێ جڤاتا سه‌رکرداتییا پارتییا دیمۆکرات یا کوردستانێ ل که‌رکووک و گه‌رمیان به‌رسڤا داخویانییه‌کا قه‌یس غه‌زعه‌لی، سه‌رۆکێ میلیشیایا عه‌سایب ئه‌هلولحه‌ق دا و راگه‌هاند: گه‌ر ژ سه‌ر خاترا ئه‌رێنییا نها یا په‌یوه‌ندییێن حکومه‌تا هه‌رێما کوردستانێ و یا فیدرال یا ئیراقێ نه‌با، پارتی خوه‌ ل هه‌مبه‌ر ره‌وشا که‌رکووکێ بێده‌نگ نه‌دکر و بێهنفره‌‌هـ نه‌دبوو و نه‌دهێلا یێن مینا غه‌زعه‌لی و پارێزگارێ سه‌پاندی یێ که‌رکووکێ جهێ خوه‌ د باره‌گه‌هێن پارتی دا ل که‌رکووکێ ڤه‌ چێکه‌ن.
پشتی دوهی به‌لاڤبووی، کو ل گۆره‌ی رێککه‌فتنا پارتی و به‌غدا، دێ ل ده‌مه‌کێ نێزیک هه‌موو باره‌گه‌هێن پارتی ل که‌رکووکێ ژ ئالییێ فه‌رمانده‌یا ئۆپه‌راسیۆنێن هه‌ڤپشک ڤه‌ هێنه‌ چۆلکرن و پارتی دێ ڤه‌گه‌ریته‌ که‌رکووکێ، غه‌زعه‌لی خوه‌ ل تۆرێن جڤاکی نه‌رازی کربوو و ژ حکومه‌تا ئیراقێ خواستبوو، رێ ب پارتی نه‌هێته‌ دان.