وەزیرێ بەرگرییا ئەمریکا گەهشتە بەغدا

وەزیرێ بەرگرییا ئەمریکا گەهشتە بەغدا و بریارە ل گەل بەرپرسێن ئیراقی باس ل ڤەگوهاستنا هێزێن خوە ژ سووریێ بۆ ئیراقێ بکەت.
مارک ئێسپەر، وەزیرێ بەرگرییا ئەمریکا د چوارچووڤەیێ سەرەدانا خوە یا رۆژهەلاتا ناڤین دا، ژ عەرەبستانا سعوودی گەهشتە بەغدا و بریارە ل گەل عادل عەبدولمەهدی، سەرۆکێ حکومەتا ئیراقێ و بەرپرسێن دی یێن بلند ژبلی شەرێ بەردەوام یێ داعشێ، گۆتوبێژان دەربارەی ڤەکێشانا هێزێن ئەمریکا ژ سووریێ، کو نها پشکه ک ژێ ل هەرێما کوردستانێ بنەجهـ بوویە، بکەت.
پشتی بریارا دۆنالد ترامپ، سەرۆکێ ئەمریکا یا ڤەکێشانا هێزێن خوە ژ رۆژئاڤایێ کوردستانێ، سێ کاروانێن سەربازی یێن سوپایێ ئەمریکا ب رێیا سێمالکا هاتبوونە د ئاخا هەرێما کوردستانێ دا و نها ل بنگەهێ سەربازی یێ ئەمریکی ل فرۆکەخانەیا هەولێرێ ماینە، تاکو بریار دهێتە دان، ڤەگەرنە ئەمریکا.