دانوستاندن دگەل بەغدایێ . . .

ڤێ ژ سەرێ خۆ بیننە دەرێ کو دگەل عێراقێ بگەھینە ھیچ رێککەفتنەکێ. عێراق ب ھیچ تشتەکی ژ مە رازی نابیت ، ژ بلی دەستبەردان ژ ھەبوون و دۆز و داخوازا کوردستانیبوونێ . بابەت نە نەفتە و نە گومرکە و نە تشتەکێ دییە.ئەڤە شەڕێ ھەبوون و نەبوونێیە. ئەو دخوازن ئەم نەبین و مە بڕیار دایە ئەم ھەبین .شاندا دانوستانکارا کوردستانێ ھەموو مەرج و داخوازیێن بەغدایێ و ئەرکێن لسەر ھەرێمێ بنەجھ کر ، لێ حکومەتا عەرەبیا شیعەیا بەغدایێ ئامادە نینن مافێن مە بدەن . نھۆ دبێژن دەستور شاشی تێدا ھەنە و دڤێت دەستور بھێتە گوھۆڕین .دەستوری ژی بگوھۆڕن دێ ھێجەتەکا دی ڤەبینن بۆ رەڤین ژ دانا مافێ کوردستانیان.ئەگەر ئەم ژ خۆ پشتڕاست نەباین و لسەر حەق نەباین ، ھێژا مەسرور بارزانی داخواز نەدکر کو نەتەوەیێن ھەڤگرتی وەک چاڤدێر و دادڤان پشکدار بن د دانوستاندنێن مەدا.باشترین و راستترین شول ئەوە کو حکومەتا ھەرێما کوردستانێ سەر ژ نوو داھاتێن خۆ کۆم بکەت و جارەکا دی مووچە و پێژینان رێک بێخیتەڤە . تێرا چەندێ کر ھندێ دابەش بکەت .لھیڤیا بەغدا نەمینن . بودجەیا سالا نوو ژی دێ پشکا ھەرێمێ تێدا دیار کەن لێ دێ ھێجەتەکێ ڤەبینن بۆ نەدانا پشکا کوردستانێ .ھەقە خۆنیشاندەرێن سلێمانیێ و ئەندامێن پارلەمانێن بناڤ کوردستانی و ب کریار عێراقی ژ حکومەتا عێراقێ بپرسن پشکا ھەرێمێ ژ 2014 و ھێرڤە د یاسایا بودجەیا عێراقێدا چی لێھاتیە و کوڤە چوویە؟!