رێبه‌ر ئه‌حمه‌د: لێكتێگه‌هشتنه‌كا باش ل گه‌ل به‌غدا ل سه‌ر ئاستێ سه‌رۆك وه‌زیران بۆ هه‌ماهه‌نگیێ یا هه‌ی
وه‌زیرێ ناڤخوه ل هه‌رێما كوردستانێ راگه‌هاند، ئه‌و ڤالاتیا ئه‌منی ل ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستاانێ دا هه‌ی، ده‌لیڤه‌كا باشه بۆ تیرۆرستان دروستكریه، دیاركر ژی ل گه‌ل حوكمه‌تا فیدرالی د دانوستاندنان داینه و لێكتێگه‌هشتنه‌كا باش ل سه‌ر ئاستێ سه‌رۆك وه‌زیران بۆ هه‌ماهه‌نگیێ یا هه‌ی.
رێبه‌ر ئه‌حمه‌د، وه‌زیرێ ناڤخوه ل هه‌رێما كوردستانێ د كۆنگره‌كێ رۆژنامه‌ڤانی دا، گۆت” ل چه‌ند رۆژێن بۆری هێرش ل سه‌ر فرۆكخانا هه‌ولێر یا نێڤده‌وله‌تی هاته كرن، وێ هێرشا تیرۆرستی ریسوا دكه‌ین و ڤه‌كۆلین ژی یا به‌رده‌وامه، بۆ وێ چه‌ندێ بهێته زانین ئه‌و لایه‌نێ ئه‌و كریارا تیرۆرستی ئه‌نجامدای كیه و ل چ ئاراسته‌كی ژی هاتیه، ئه‌وا مه‌ترسی د وێ هێرشێ دا، بكارئینانا فرۆكا بێ فرۆكه‌ڤانه، كو ئه‌و ژی كاره‌كێ تیرۆرستی یه”.
گۆت ژی” هه‌رچه‌نده ئه‌نجامدانا وێ هێرشا تیرۆرستی ل سنوورێ هه‌رێما كوردستانێ نه‌بوو، به‌لێ مه ل گه‌ل حوكمه‌تا عیراقێ و هه‌ڤپه‌یمانان به‌حسێ وێ چه‌ندێ كریه كو ب رێیا هه‌ماهه‌نگیێ رێگری ل وان جۆره كریارێن تیرۆرستی بهێته كرن”.
سه‌باره‌ت رێككه‌فتنا شنگالێ، وه‌زیرێ ناڤخوه ل هه‌رێما كوردستانێ ئاماژه ب وێ چه‌ندێ كر كو هیچ پێشڤه‌چوونه‌ك ل سه‌ر وێ رێككه‌فتنێ نینه، ئه‌و هێزێن نوكه ل شنگالێ هه‌ین، هه‌مان ئه‌و هێزن یێن پێشتر ل وێرێ بوون، هیچ گاڤه‌ك بۆ بجهئینانا وێ رێككه‌فتنێ نه‌هاتیه هاڤێتن، داخوازێ ژ حوكمه‌تا فیدرالی و نه‌ته‌وێن ئێكگرتی دكه‌ین، هه‌ماهه‌نگیێ ل گه‌ل حوكمه‌تا هه‌رێما كوردستانێ بكه‌ن، تاكو ئه‌و رێككه‌فتن بهێته بجهئینان”.
رێبه‌ر ئه‌حمه‌د رۆهنكر ژی كو هه‌بوونا هێزا بیانی زیانێن مه‌زن گه‌هاندینه وه‌لاتیێن هه‌رێمێ، ئه‌و هێرشێن په‌كه‌كه ژی ل ده‌ڤه‌رێن سنووریێن هه‌رێما كوردستانێ ئه‌نجام دده‌ت، په‌یوه‌ندی ب هه‌رێما كوردستانێ و عیراقێ ڤه نینه، به‌لكو كێشێن ده‌ره‌كی نه و پێدڤیه ئه‌و كێشه ژ سنوورێ هه‌رێما كوردستانێ بهێنه دوورخستن، چونكه ئه‌و ئۆپه‌راسیۆنێن دهێنه ئه‌نجامدان، كاریگه‌ریێ ل ژیانا وه‌لاتیێن هه‌رێما كوردستانێ دكه‌ن و داخوازێ ژ لایه‌نێن په‌یوه‌ندیدار دكه‌ین، وێ كێشێ ژ هه‌رێما كوردستانێ دوور بێخن”.
ئاشكراكر ژی” ئه‌و ڤالاهیا د هێزێن پێشمه‌رگه‌ی و له‌شكرێ عیراقی دا هه‌ی ل ده‌ڤه‌رێن كوردستانی یێن ده‌رڤه‌ی ئیدارا هه‌رێمێ، ده‌لیڤه‌كا باش بۆ تیرۆرستان دروستكریه، هه‌موو ئه‌و گرۆپێن شێوازێ تیرۆرستان دگرنه‌به‌ر بۆ ئارمانجگرتنا هه‌رێما كوردستانێ و پێشمه‌رگه‌ی و هێزێن عیراقێ ژی، مفا ژ وێ ڤالاهیا ئه‌منی وه‌رگرتیه و حوكمه‌تا هه‌رێمێ د دانوستاندنێن راسته‌وخوه دایه ل گه‌ل حوكمه‌تا فیدرالی، ژ روویێ دانوستاندنان پێشكه‌فتنه‌كا باش یا هه‌ی، به‌لێ ژ روویێ واقعی ڤه هیچ نه‌هاتیه بجهئینان”.
ئاماژه ب وێ چه‌ندێ كر” ئه‌م د به‌رده‌وامین ل سه‌ر وان دانوستاندنان، مه ئومێد ژی ب حوكمه‌تا مسته‌فا كازمی یا هه‌ی، تاكو د ڤان پێنگاڤان دا بهێته پێش، لێكتێگه‌هشتنه‌كا باش ل ئاستێ سه‌رۆك وه‌زیران و وه‌زیران دا یا هه‌ی، ئه‌وا مای، ئه‌و ژۆرا هه‌ماهه‌نگیێ یه د ناڤبه‌را پێشمه‌رگه‌ی و هێزێن عیراقی بهێته دروستكرن، تاكو بشێن كارێن خوه بكه‌ن و ئێدی تیرۆرست نه‌شێن مفای ژ وێ ڤالاهیا ئه‌منی وه‌ربگرن”
