بنگه‌هه‌كێ هه‌ڤپشك یێ پێشمه‌رگه‌ی و له‌شكرێ عیراقێ ل كه‌ركووكێ دێ هێته ڤه‌كرن
ژێده‌ره‌كێ ئاگه‌هدار ل حوكمه‌تا عیراقێ ئاشكراكر، ژ ئه‌گه‌رێ زێده‌بوونا مه‌ترسیا داعشێ، حوكمه‌تا عیراقێ رازی بوو بنگه‌هه‌كێ هه‌ڤپشك یێ پێشمه‌رگه‌ی و له‌شكرێ عیراقێ ل ده‌ڤه‌را (كه‌ی وه‌ن) ل كه‌ركووكێ بهێته ڤه‌كرن، كوپ ێشتر خالا ناكۆكیێ بوو د ناڤبه‌را وه‌زاره‌تا پێشمه‌رگه و وه‌زاره‌تا به‌رگریا عیراقێ.
وی ژێده‌رێ حوكمه‌تا عیراقی گۆت” حوكمه‌تا عیراقێ پێشتر رازی نه‌دبوو كو بنگه‌هێ هه‌ڤپشك یێ پێشمه‌رگه‌ی و له‌شكرێ عیراقێ ل (كه‌ی وه‌ن) بهێته ڤه‌كرن و ب هه‌موو شێوه‌كی ئه‌و چه‌نده ره‌ت دكر، ژلایێ خوه‌ڤه هێزا پێشمه‌رگه‌ی ژی رازی نه‌دبوو ل جهه‌كێ دی ئه‌و بنگه‌هه بهێته ڤه‌كرن كو ئه‌و چه‌نده خالا ناكۆكیێ بوو د ناڤبه‌را هه‌ردو لایه‌نان، له‌وما دروستكرنا چار ژۆرێن هه‌ڤپشك ل ده‌ڤه‌رێن كوردستانێ، ژبه‌ر وی ئه‌گه‌رێ گیرو ببوو”.
ژێده‌رێ ناڤبری زێده‌تر بۆ مالپه‌رێ فه‌رمیێ پارتی گۆت” نوكه ژ ئه‌گه‌رێ زێده‌بوونا مه‌ترسیا داعشێ و هێرشێن رۆژانه یێن چه‌كدارێن وێ رێكخراوا تیرۆرستی بۆ سه‌ر هێزێن عیراقی، حوكمه‌تا عیراقێ رازی بوو بنگه‌هه‌كێ هه‌ڤپشك یێ پێشمه‌رگه‌ی و له‌شكرێ عیراقێ ل (كه‌ی وه‌ن) ل كه‌ركووكێ بهێته ڤه‌كرن”.
لیوا (قاره‌مان كه‌مال) جێگرێ سوپاسالارێ پێشمه‌رگه‌ی راگه‌هاند” حوكمه‌تا عیراقێ داخواز كریه ب زووترین ده‌م ژۆرا هه‌ڤپشك ل ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ بهێنه دروستكرن، چونكه ده‌مه‌كه بریار پێ هاتیه دان و داخواز هاتیه كرن ب زووترین ده‌م بهێته بجهئینان و ده‌ست ب دروستكرنا وان بهێته كرن”.
لیوا قاره‌مانی به‌حس ل وێ چه‌ندێ ژی گر كو پێشتر حوكمه‌تا عیراقێ فه‌رمان ده‌ركبوو بێ پرس و راوێژكرن ل گه‌ل مه و مه ژی ئه‌و چه‌نده ره‌تكربوو، له‌وما نوكه ژ ئه‌گه‌رێ مه‌ترسیا داعشێ یا رازی بووی ئه‌و كاره ب هه‌ڤپشكی بهێته كرن و ب رازیبوونا هه‌ردو لایه‌نان بیت، له‌وما دێ ده‌ست ب پێرابوونان هێته كرن بۆ وێ چه‌ندێ ئه‌و چار ژۆرێن بریارێن ب دروستكرنا وان هاتیه دان، بهێنه دروستكرن، چونكه داعش یا بوویه مه‌ترسیه‌كا جدی.
