هه‌لبژارتنێن ڤێجارێ نابنه ئه‌گه‌رێ گۆهۆرینێن به‌رچاف د پرۆسا سیاسی یا عیراقێ دا
چار هه‌یڤ بۆ ژڤانێ ئه‌نجامدانا هه‌لبژارتنێن پێشوه‌خت یێن عیراقێ ماینه و لایه‌نێن عیراقی ژی مژوولی به‌رهه‌ڤیانه بۆ وان هه‌لبژارتنان ، به‌رپرسه‌كێ ده‌زگه‌هێ هه‌لبژارتنێن پارتی دیموكراتی كوردستان ژی دبێژیت، هه‌لبژارتنێن ڤێجارێ نابنه ئه‌گه‌رێ گۆهۆرینێن به‌رچاف د پرۆسا سیاسی یا عیراقێ دا.
هاوار محه‌مه‌د، به‌رپرسێ پشكا قانوونی ل ده‌زگه‌هێ هه‌لبژارتنێن پارتی دیموكراتی كوردستان بۆ رۆژناما (ئه‌ڤرۆ) گۆت” پێشبینی دهێته كرن هه‌لبژارتنێن پێشوه‌خت یێن جڤاتا نوونه‌رێن عیراقێ نه‌بنه ئه‌گه‌رێ گوهۆرینێن به‌رچاف د پرۆسا سیاسی یا عیراقێ دا، چونكه هه‌مان ئه‌و سیاسی و حزبێن نوكه دناڤا ده‌ستهه‌لاتا عیراقێ دا، دێ جاره‌كادی پێگه‌هێ خوه گرن و ده‌نگێن وه‌لاتیێن عیراقی ب ده‌ستڤه ئینن، هه‌رچه‌نده قانوونا هه‌لبژارتنێن عیراقێ یا هاتیه گۆهۆرین، به‌لێ هه‌ر هه‌مان حزبێن نوكه دێ ل رێزا به‌راهیێ بن، تنێ دهێته چاڤه‌رێكرن هنده‌ك گوهۆرینێن گه‌له‌ك ساده هه‌بن ئه‌وژی ب ئه‌گه‌رێ قانوونا نوكه یا هه‌لبژارتنان، لێ كارڤه‌دانێن ستراتیژی و گوهۆرینێن به‌رچاف د مه‌یدانا سیاسی یا عیراقی دا په‌یدا نابن”.
هاواری زێده‌تر گۆت” بایكۆتا هه‌لبژارتنان كاره‌كێ باش نینه، چونكه مه دیت ل سالێن ده‌ستپێكێ یێن پشتی پرۆسا ئازادیا عیراقێ، پێكهاتا عه‌ره‌بێن سوننه بایكۆتا پرۆسا هه‌لبژارتنێن عیراقێ كر و د ئه‌نجامدا هاتنه پشتگو هاڤێتن و دوورخستن ژ پرۆسا سیاسی و ده‌ستهه‌لاتێ و هه‌تا ئه‌ڤرۆ ژی كاریگه‌ریا بایكۆتا سالا ٢٠٠٥ێ یا ل سه‌ر عه‌ره‌بێن سوننه مای، ئانكو بایكۆتا هه‌لبژارتنان بۆ چ لایه‌نه‌كێ سیاسی چاره‌سه‌ر نینه، ب تایبه‌تی هنده‌ك لایه‌نێن عیراقی یێن هه‌ین كو ل ده‌ستپێكێ ب شاشی ڤه ل قانوونا هه‌لبژارتنان گه‌هشتبوون، چونكه قانوونا هه‌لبژارتنێن عیراقێ ب دیتنا مه زێده‌تر د به‌رژه‌وه‌ندیا لایه‌نێن مه‌زن یێن عیراقێ دایه، نه‌كو كه‌سێن سه‌ربخوه و هنده‌ك گرۆپ و لایه‌نێن بچووك، راسته كۆمه‌كا گه‌نجێن عیراقی نوكه خوه به‌ربژار كریه ب شێوه‌یێ سه‌ربخوه، به‌لێ هژمارا وان ده‌مێ ده‌رچوونێ چ كاریگه‌ری ل سه‌ر پرۆسا سیاسی نابیت و رۆله‌كێ كاریگه‌ر و به‌رچاڤ ژی نابیت “.
ل دۆر به‌رهه‌ڤیێن پارتی دیموكراتی كوردستان بۆ هه‌لبژارتنان، هاوار محه‌مه‌د ئاماژه كر” ب گۆره‌ی پلان و پێنگاڤێن كۆمسیۆنا بلند یا هه‌لبژارتنان ل عیراقێ، پارتی ژی به‌رهه‌ڤیان بۆ هه‌لبژارتنێن پێشوه‌خت یێن عیراقێ دكه‌ت، پارتی ٥٥ به‌ربژار پێشكه‌شی كۆمسیۆنێ كرینه و د قۆناغا بهێت دا، دێ پارتی به‌ربژارێن خوه ل سه‌ر بازنه‌یێن هه‌لبژارتنان به‌لاڤ كه‌ت و پارتی حزبه‌كا رێكخستیه و ته‌كتیكا خوه یا هه‌ی بۆ دانان و به‌لاڤكرنا به‌ربژار و ده‌نگده‌رێن خوه، له‌ورا ئه‌م ب باوه‌رین كو لایه‌نێن دی یێن كوردستانێ و عیراقێ نه‌شێن وه‌كو پارتی پلانا خوه دارێژن، ژ به‌ر كو پارتی خودان جه‌ماوه‌ر و پێگه‌هێ خوه یێ تایبه‌ته و دشێت ب شاره‌زایێ كار بۆ ب ده‌ستڤه ئینانا زۆرترین كۆرسیان بكه‌ت”.
هاوار محه‌مه‌د ئاشكراكر” هه‌ر ژ ده‌ستپێكێ پارتی پێشنیاز كربوو لایه‌نێن كوردستانی ل هه‌رێما كوردستانێ و ده‌ڤه‌رێن كوردستانی یێن سنورێ مادێ ١٤٠ ب ئێك لیست پشكداریێ د هه‌لبژارتنێن جڤاتا نوونه‌رێن عیراقێ دا بكه‌ن، ئه‌ڤه ژی بۆ دیاركرنا پێگه‌هێ كوردان ل ده‌ڤه‌رێن كوردستانی، چونكه هه‌لبژارتنێن ئه‌ڤ ساله دێ مینا ریفراندۆمه‌كێ بیت بۆ ده‌ڤه‌رێن ده‌رڤه‌ی ئیدارا حوكمه‌تا هه‌رێما كوردستانێ، هه‌موو بزاڤێن پارتی ل سه‌ر ئاستێ سه‌ركردایه‌تی و پێشنیازا سه‌رۆكێ هه‌رێما كوردستانێ ئه‌وبوون كورد هه‌ڤپه‌یمانیه‌كێ دروست بكه‌ن بۆ هه‌لبژارتنێن داهاتی، به‌لێ مخابن نه‌گه‌هشتینه چو ئه‌نجامه‌كی، لێ ئه‌ڤه دوماهی ده‌لیڤه نینه و پشتی هه‌لبژارتنان كورد دشێن دچاچوڤێ ئێك فراكسیۆن دا ل جڤاتا نوونه‌رێن عیراقی یا داهاتی كار بۆ ب ده‌ستڤه ئینانا مافێن گه‌لێ خوه بكه‌ن، ب تایبه‌تی ژی ل ده‌ڤه‌رێن كوردستانی یێن دكه‌ڤنه سنورێ مادێ ١٤٠ یێ دستورێ عیراقێ”.
