ڤه‌كۆله‌ره‌ك: توركیا دێ گرۆپێن جیهادی ل دژی كوردان بكار ئینیت
فه‌هیم تاشته‌كین نڤیسه‌ر و ڤه‌كۆله‌رێ ناڤدارێ توركیا راگه‌هاند كو ب هزاران چه‌كدارێن سووری نها ل توركیا دژین، ده‌ه سالن چه‌كی بكار دئینن و وان گه‌له‌ك تاوان ژی ل دژی مرۆڤاتیێ ل سووریێ و لیبیا ئه‌نجام داینه، بێگومان نها توركیا مه‌هانه پاره ژی دده‌ته وان لێ ب ده‌می ئه‌و گرۆپێن چه‌كدار دێ بنه به‌لا سه‌رێ توركیا و هه‌ر ژ نها ڤه توركیا كار بۆ هندێ دكه‌ت كو وان گرۆپێن هشكباوه‌ر د شه‌ران دا بۆ به‌رژه‌وه‌ندیێن خوه بكار بینیت دا ژناڤ بچن و گۆت: (بێگومان نها ل سووریێ و هه‌رێما كوردستانێ توركیا شه‌رێ په‌كه‌كێ دكه‌ت، یێ نها د مه‌یدانێ دا شه‌ری دكه‌ن گرۆپێن چه‌كدارێن سووری نه و توركیا ژی دڤێت به‌لا وان ژ خوه ڤه‌كه‌ت، چونكو نها گه‌له‌ك به‌لگه به‌لاڤ بووینه كو نیشا دده‌ن كا چاوا توركیا وان گرۆپێن چه‌ته و مافیا بكار دئینیت و ئه‌و یه‌ك ژی دێ بیته به‌لا سه‌رێ توركیا).
ڤه‌هیم تاشته‌كین نڤیسه‌ر و ڤه‌كۆله‌رێ ناڤدارێ توركیا كو ب سالانه ل دۆر قه‌یرانا سووریێ ڤه‌كۆلینان دكه‌ت ئه‌و یه‌ك ژی دیار كر كو ده‌مه‌كه كه‌سه‌ك ب ناڤێ سه‌دات په‌كه‌ر گه‌له‌ك ڤیدیۆ به‌لاڤ كرن كو تێدا ئاماژه ب هندێ دكه‌ت كا توركیا چاوا چه‌كدارێن سووری بۆ مه‌ره‌مێن خوه بكار دئینیت، بێگومان د سه‌رده‌مێ ترامپی دا ئه‌مریكا ژ به‌ر هندێ به‌رژه‌وه‌ندیێن خوه بێده‌نگ بوو، لێ د سه‌رده‌مێ نها دا بایدن وان تشتان قه‌بوول ناكه‌ت و دێ توركیا گه‌له‌ك ته‌نگاڤ بیت، ژ به‌ر هندێ ژی ئه‌ردۆگان و حوكمه‌تا وی دێ وان گرۆپان بكار ئینن و دڤێت ئه‌م چاڤه‌رێ هندێ بین كو دێ ل سالا ٢٠٢١ توركیا شه‌رێ خوه ل دژی په‌كه‌كێ ل هه‌رێما كوردستانێ و توركیا به‌رفره‌هتر لێ كه‌ت.
ناڤهاتی د دووماهیا ئاخڤتنا خوه دا ئه‌و یه‌ك ژی دیار كر كو هه‌تا نها ئه‌مریكا رێ نه‌دایه توركیا ده‌ست ب ئۆپه‌راسیۆنه‌كا نوو ل باكورێ سووریێ بكه‌ت لێ دبیت توركیا ل حه‌له‌بێ یان ژی ئدلبێ وان گرۆپان بكار بینیت دا ژناڤ بچن، ژ به‌ر هندێ ژی تشتێ نها دیاره سالا داهاتی ژی شه‌ر دێ ل توركیا و سووریێ به‌رده‌وام بیت
