مه‌حمود محه‌مه‌د: په‌كه‌كێ ب زورى دڤێت هه‌رێمێ و پێشمه‌رگه‌ى راكێشیته شه‌ره‌كى
مه‌حموود محه‌مه‌د ئاخفتنكه‌رێ مه‌كته‌با سیاسیا پارتى دیموكراتى كوردستان راگه‌هاند، هێزێن ئه‌قلیمی هه‌ماهه‌نگى و كارێن هه‌ڤپشك ئه‌نجامداینه بۆ هندێ كو ل هه‌رێما كوردستانێ ئێك مه‌رجه‌ع نه‌هێته دروستكرن، چونكى ئه‌و دزانن درووستبوونا ئێك مه‌رجه‌عیێ پێگه‌هـ و پاشه‌رۆژا كوردستانێ بهێزتر دكه‌ت.
ئاخفتنكه‌رێ مه‌كته‌با سیاسیا پارتى د گۆتاره‌كێ دا ل ژێر ناڤێ (هه‌رێما كوردستانێ دناڤبه‌را ئێكگرتن و ئاریشێن ناڤخۆیی) دا دبێژیت، پارتى گه‌له‌ك جاران قوربانى ب مافێن خۆ داینه بۆ هندێ ئێكرێزى و ئێكگرتن ل كوردستانێ هه‌بیت و به‌ره‌ڤ پێشڤه بچیت، مه‌ره‌ما وان ژى پێكڤه ژیانا سیاسیه كو ئه‌و ژى دروشمێ سه‌ره‌كیێ پارتیه ل پشتى كونگره‌یێ سێزدێ.
ل دۆر چالاكی و ده‌ستدرێژیێن په‌كه‌كێ ل ده‌ڤه‌رێن سنورى، ئاخفتنكه‌رێ پارتى راگه‌هاندیه، پشتى سه‌رهه‌لدانێ و دروستكرنا په‌رله‌مان و حكومه‌تا هه‌رێمێ، په‌كه‌كه دژایه‌تیا هه‌رێمێ دكه‌ت و دانپێدانێ ب ده‌ستهه‌لاتێن هه‌رێمێ ناكه‌ت. ب ئه‌گه‌رێ په‌كه‌كێ ژى ب سه‌دان گوند نه‌هاتینه ئاڤه‌دانكرن و نوكه ژى ب سه‌دان گوندێن دى ل هه‌رێمێ به‌ره‌ڤ چۆلبوونێ دچن.
ئاشكرا كریه ژى كو په‌كه‌كه دخوازیت ب زۆرى هێزێن پێشمه‌رگه‌ى بۆ شه‌رى راكێشیت، و ل هه‌ر جهه‌كێ ده‌ڤه‌رێن ده‌رڤه‌ى ئیدارا هه‌رێمێ كو حه‌شدا شه‌عبی لێ هه‌یه په‌كه‌كه ژى ل وێرێ یه و پشته‌ڤانیا وان دكه‌ت، هه‌روه‌سا په‌كه‌كه رێگره ژ رێككه‌ڤتنا شنگالێ، ئه‌گه‌ر ئه‌و رێكه‌ڤتن هاتبا بجهئینان دا رێكێ ل به‌رامبه‌ر رێككه‌ڤتنێن ب وى ره‌نگى بۆ ده‌ڤه‌رێن دى ژى خۆشكه‌ت.
ل دووماهیێ ئاخفتنكه‌رێ مه‌كته‌با سیاسیا پارتى گۆتیه: باوه‌ریا گه‌لێ كوردستانێ ب پارتى و سه‌رۆك بارزانى ژ به‌رهندێ یه كو ئه‌و دزانن دۆزا گه‌لێ كورد د ده‌سته‌كێ ئه‌میندایه و پارتى و بارزانى ب هه‌مى شێوازه‌كى كاردكه‌ن بۆ پێشكه‌ڤتنێن زێده‌تر د هه‌مى بیاڤان دا.
