دەزگایێ گشتی یێ پاراستنا ئالایێ کوردستانێ ل ھەولێرا پایتەخت نڤیسینگەھا خوە ڤەکر

ب ئامادەبوونا بەرێز عەلی عەونی ئەندامێ جڤاتا سەرکردایەتیێ و بەرپرسێ لقێ٨ یێ پارتی دیموکراتی کوردستان، و شرین ئامێدی ئەندامێن جڤاتا سەرکردایەتیا پارتی دیموکراتی کوردستان، دەزگایێ گشتی یێ پاراستنا ئالایێ کوردستانێ ل ھەولێرا پایتەخت نڤیسینگەھا خوە ڤەکر، و ستافەکێ حەفت کەسی ژبو وێ نڤیسینگەھێ دانان، دگەلدا ستافەکێ شیرەتکاری ژی ژ چەندین سەرکردە و رەوشەنبیرێن وێ دەڤەرێ ژبو برێڤەچوونا کارێ نڤیسینگەھا پاراستنا ئالایێ کوردستانێ دێ ھێتە دانان.د پەیڤەکێ دا بەرێز عەلی عەونی، پیروزباھیا ستافێ نوی یێ نڤیسینگەھا ھەولێرێ یا دەزگایێ گشتیێ پاراستنا ئالایێ کودستانێ کر، و بزاڤا وان ب ئەرک و کارەکێ نشتیمانی دا دیارکرن کو ژپێخەمەت پاراستنا ئالایێ کوردستانێ و پیروزیێن نەتەوەیی ھەژمارەکا گەنجێن خودان شیان ئەرکێ وێ بستو خوەڤە گرتینە. بەرێز عەلی عەونی پشتەڤانیا خوە بو دەزگایێ پاراستنا ئالایێ کوردستانێ دا دیارکرن، و ھیڤی خواست د کارێ خوەدا سەرکەفتی بن.