عیراق دژى له‌شكركێشیا توركیا ده‌ست ب بزاڤان كر

  یه‌حیا ره‌سول ئاخفتنكه‌رێ فه‌رمانده‌یا هێزێن چه‌كدارێن عیراقێ راگه‌هاند ل دژى ده‌ستدرێژیێن توركیا بو سه‌ر ده‌ڤه‌رێن سنورى یێن هه‌رێما كوردستانێ ده‌ست ب لڤینێن دبلوماسى كریه‌ .

د داخویانیه‌كێ دا یه‌حیا ره‌سول گوت : لڤینێن دبلوماسى برێكا وه‌زاره‌تا ده‌رڤه‌ یا عیراقێ سه‌باره‌ت ده‌ستدرێژیێن توركیا بو سه‌ر ده‌ڤه‌‌رێن سنورى یێن عیراقێ دێ هێنه‌ ئه‌نجامدان .

هه‌روه‌سا ئاماژه‌ دایه‌ كو دستورێ عیراقێ ته‌ئكید ل سه‌ر رێزگرتنا سه‌روه‌ریا تمام یا ئاخا عیراقێ دكه‌ت و پێدڤیه‌ هه‌مى وه‌لات رێز ل عیراقێ و سه‌روه‌ریا ئاخا عیراقێ بگرن .

هه‌روه‌سا گوت : عیراق یا رازى نینه‌ كو ئاخا وێ بو هه‌ر كریاره‌كا تیرورستى بو هه‌ر وه‌لاته‌كى بهێته‌ بكارئینان و پێدڤیه‌ توركیا سه‌روه‌ریا ئاخا عیراقێ ل به‌رجاڤ وه‌ربگریت و هه‌ر ده‌مێ پێزانینه‌ك ژ هه‌ر لایه‌نه‌كى بگه‌هیته‌ توركیا دڤێت ئه‌و پێزانینه‌ بگه‌هنه‌ عیراقێ و عیراق سه‌ره‌ده‌ریێ دگه‌ل ره‌وشا بڤى ره‌نگى بكه‌ت .