ل سه‌ر راسپاردا سه‌روكێ حكومه‌تا هه‌رێمێ پێدڤیێن نه‌خوشخانێن په‌نجه‌شێرێ ل هه‌رێمێ دێ هێنه دابینكرن
ل سه‌ر فه‌رمانا مه‌سرور بارزانى سه‌رۆكێ حكومه‌تا هه‌رێما كوردستانێ، بریار هاته‌دان هه‌یڤانه كۆژمێ ئێك ملیار و شه‌ش سه‌د ملیۆن دینار بۆ نه‌خۆشخانه‌یێن تایبه‌ت ب چاره‌سه‌ركرنا تووشبوویێن په‌نجه‌شێرێ ل هه‌رێما كوردستانێ بهێنه خه‌رجكرن بۆ كڕینا ده‌رمان و دابینكرنا ئامیر و تاقیگه‌هـ و پێدڤیێن نوشدارى.
ل دویڤ نڤێسارا ژماره 7 هزار و 291 كو ئه‌ڤرۆ ئێكشه‌مبی ده‌ركه‌فتییه و ئاراسته‌ى وه‌زارتا دارایی و ئابوورى یا هه‌رێمێ هاتییه كرن، هویركاریێن ڕازیبوون لسه‌ر خه‌رجكرنا كۆژمه‌كێ پاره‌ى بۆ نه‌خۆشخانه‌یێن نانه‌كه‌لى و رزگارى ل هه‌ولێرێ و هیوا ل سلێمانیێ و ئازادى ل دهۆكێ و هاتینه دیاركرن.
هه‌روه‌سا ل دویڤ نڤێسارێ، سه‌رۆكێ حكومه‌تێ ڕازیبوون ل سه‌ر خه‌رجكرنا ئێك ملیار و 27 ملیۆن و 6 سه‌د هزار دینارێن هه‌یڤانه بۆ جهگرتییێ كلینیكان دایه. د وێ نڤێسارێدا سه‌رۆكێ دیوانێ هویركاریێن خه‌رجكرنێ رونكرینه.
