سه‌روكێ هه‌رێما كوردستانێ دگه‌ل هنارتیێ ئه‌مریكا بو هه‌ڤپه‌یمانیا ده‌وله‌تى كومبوو
ئه‌ڤرو نێچیرڤان بارزانى سه‌روكێ هه‌رێما كوردستانێ پێشوازى ل جان گادفره‌ى هنارتییێ تایبه‌تێ ئه‌مریكا بۆ هه‌ڤپه‌یمانییا ده‌وله‌تى یا دژى داعش ب وه‌كاله‌ت و شاندێ دگه‌لدا كر.
د كۆمبوونێ دا دویماهیك پێشڤه‌چوونێن به‌رسینگگرتنا تیرورێ و گه‌ف و لڤینێن داعش ل عیراقێ گه‌نگه‌شه‌كرن و دووپاتى ل پێدڤییێن گرنگ و بزاڤ و هاریكاری و میكانیزمێن كاڕا و هه‌ماهه‌نگییا دناڤبه‌را سوپایێ عیراق و پێشمه‌رگه‌ى دا ب پشته‌ڤانییا هێزێن هه‌ڤپه‌یمان بۆ ژناڤبرنا ئێكجارى یا داعش بتایبه‌تى ل ده‌ڤه‌رێن ڤالاهییا ئه‌منى لێ هه‌ى هاته‌كرن.
هه‌ردوولا هه‌ڤبۆچوون بوون لسه‌ر وێ چه‌ندێ كو به‌رده‌وامییا شه‌رێ داعش گه‌فا ڕاسته‌قینه و مه‌ترسییه‌كا جددییه بۆ سه‌ر ئاسایش و ئارامییا عیراق و سورى و ڕۆژهه‌لاتا ناڤین بگشتى و هه‌تا وه‌لاتێن ئه‌فریقیا ژى ، هه‌روه‌سا دووپاتى ل وێ چه‌ندێ هاته‌كرن كو شه‌رێ دژى داعش و توندڕه‌وییێ بتنێ بڕێكا له‌شكرى چاره‌سه‌ر نابیت، به‌لكو دڤێت ڕێكێ ل ئه‌گه‌رێن سه‌رهلدانا تیرور و توندڕه‌وییێ بگرن، دڤى بیاڤى دا ئاماژه ب ڕه‌وشا كه‌مپا هۆل ل سوریێ دا و دووپاتى ل كاركرنێ هاته‌كرن بۆ ڕێگریكرنا ده‌رفه‌تێن توندره‌وییێ.
