پەڕلەمانێ کوردستانێ و(عەنتیکەک سیاسی)…؟!
هەردەم پەڕلەمان ژێدەرێ شەرعیەت و بەخشینا بھایانە بۆ یاسا و رێسایان، ئەڤجا کی ئەندام پەڕلەمان بیت، ناڤ و پاشخانا وی چ بیت؟ ئەو بابەتەک گرێدای شەرت و مەرجێن رۆژەڤا رۆژگارەکینە. پەڕلەمان تا نوکە ژی سەمبولا دیمۆکراتخوازایە و ب سانەهى ب دەست مللەتان نەکەفتیە. شەڕێن مەزن و جرەیێن بھێز پەیدابووینە ھەتا پەڕلەمان ب ڤی رەنگی ژ دایکبووی ل سەر ئاستێ جیھانێ و ھێشتا ھندەک مللەت ھەنە خەونا ب ھەبوونا پەڕلەمانەکى ڤە دبینن یان(تیۆکراتیەک رھا یام ئولیگارشیەک رھا) ل وان وەلاتان حوکمدارن. پەڕلەمانێ کوردستانێ ل گورەی ھەبونا خوە ئەوا بۆ ھاتییە نەخشەکرن ب ئەرکێ خۆ رابوویە نەمازە د وارێ یاسا دانانێ دا، دبیت د وارێ چاڤدێریێ دا(چاڤ کورە بیت). لێ ئەو پەڕلەمانێ ئوپۆزسیۆن تێدا نەبیت وەک (کۆچکەکێ یە یان دیوانخانەکێ) خۆشیا دیمۆکراتیەتێ دھندێ دایە دەراڤ بۆ بوچوونا کێم کورسیکا ژی ھەیە بوچوونا خۆ دەرببڕن ھەتا ئەگەر نەرێنی بیت.
ئەوا ل دووماھی روینشتنا پەڕلەمانێ کوردستانێ رویدای ب راستی جھی راوەستیانێ یە. ئەرێ پارتی ژی بریار دایە ھەم حکومەت و ھەم ئوپۆزسیۆن بیت؟ وەک ژ مێژە حزبێن دی کریە فەرھنگ و ب سەقەتی ھەم حوکمدار و هەم بەرھنگار بووینە. ئەرێ خێربوو پارتی ژ ئوپۆزسیونێ گەرمتر؟. ب راستی فەرهەنگا سیاسی پێتڤی ناسکرنەکا تازەیە بۆ ڤی تەرزێ سیاسەتێ، دڤیا پێناسەکا دی بۆ کوالسیۆنا حوکمران و ئوپۆزسیۆنێ بهێتە دیتن. چەوا دبیت حزبێن حوکمران ل پەڕلەمانی باش خراب پشتا حکومەتا خۆ نەگرن؟. ئەرێ ھەمی پەڕلەمانتاری ئەوە کابرایەک ب زمانێ بازاری و بۆ راکێشانا ھەست و سوزەکا دەمکی ھێرشی حکومەتا خۆ بکەت؟. ئەرێ ئەرکێ ئوپۆزسیۆنێ چى یە؟ ژ راست پارتی ژی ئێدی ھندە دشێت بێژت ئەم ژ بەرپرسیارەتیێ نارەڤین کو بھێزترین و پر باوەرترین درووشمێ پارتیە؟. قەت من نە باوەرە پارتی بچیتە ژێر کلتورێ (ھەم ئوپۆزسیۆن و ھەم حکومەت). ب راستی سەرێ ھەرکەسێ د سیاسەتێ بچیت ژ کومبونا دوھی سەرگەردان بوویە. ب راستی ئەڤ زمانە و ئەڤ رەفتارە ژ پارتی ناوەشیت. پارتی ھەمی قوناغێن ئوپۆزسیۆنێ ژ سەردەمێ مەلکی تا ئوپۆزسیۆنا چەکداری خزمەتکریە بەلێ ب رومەت و پاکیێ ناڤدارە.خوزی پارتی ھەر ئەو بیت ئەوا ل جوانیێ و نیڤا تژی خودان و سینگ ڤەکری ژی بیت بو رەخنێ و ھەتا ھێرشێ ژی..؟!
