شۆڕه‌شا ئیلوونێ ب رێبه‌ریا بارزانیێ نه‌مر به‌غدا نه‌چاركر بۆ جارا ئێكێ دانپێدانێ ب مافێن كوردان بكه‌ت
شۆڕه‌شا ئیلوونا مه‌زن به‌ری ٦٠ سالان ب رێبه‌ریا بارزانیێ نه‌مر ده‌ستپێكربوو، سه‌ركرده‌كێ شۆڕه‌شا ئیلوونێ ژی ئاشكراكر، بارزانی نه‌مر نه دخوازتن شه‌ر بهێته كرن و حه‌ز ل چه‌كی نه‌بوو، به‌لێ نه‌چاربوو به‌رگریێ ژ ملله‌تێ كورد بكه‌ت، هه‌روه‌سا دبێژیت، جارا ئێكێ بوو كورد شۆڕه‌شه‌كا سه‌رتاسه‌ری ئه‌نجام بده‌ن.
د. مه‌حموود عوسمان سیاسه‌تمه‌دار و ئێك ژ سه‌ركردێن شۆڕه‌شا ئیلوونێ بۆ رۆژناما (ئه‌ڤرۆ) گۆت” به‌ری ٦٠ سالان پارتی دیموكراتی كوردستان ب سه‌رۆكایه‌تیا بارزانیێ نه‌مر بڕیارا ئه‌نجامدانا شۆڕه‌شا ئیلوونا مه‌زن دژی رژێما وی سه‌رده‌میا ئیراقێ ده‌ركر، شۆڕه‌شا ئیلوونێ شۆڕه‌شه‌كا نه‌ته‌وی بوو، ئێك سه‌ركردایه‌تی هه‌بوو ئه‌وژی پارتی دیموكراتی كوردستان ب رێبه‌رایه‌تیا مه‌لا مسته‌فایێ بارزانی، ده‌ستكه‌فتێن زۆر ژی بده‌ست شۆڕه‌شێ ڤه هاتن ژوان ژی رێكه‌فتنا ١١ی ئادارا سالا ١٩٧٠ێ، چونكه بۆ جارا ئێكێ بوو حوكمه‌تا ئێراقێ دانپێدانێ ب هژماره‌كا مافێن گه‌لێ كوردستانێ دا بكه‌ت وه‌كی دانا ئۆتۆنۆمیێ بۆ كوردستانێ و هنده‌ك مافێن كه‌لتووری و سیاسی و ئیداری، هه‌روه‌سا شۆڕه‌شێ رۆله‌كێ مه‌زن دیت بۆ دانه نیاسینا ملله‌تێ كورد ودۆزا كوردی ب جیهانێ و دۆزا كوردان ب جیهانێ هاته ناساندن، شۆڕه‌شه‌كا زێده‌تر به‌رگری بوو نه‌كو هێرشكرن، ژ به‌ر كو كورداننه دخواست شه‌ڕی بكه‌ن و تنێ دخواست به‌رگریێ ل هه‌مبه‌ر وێ سته‌ما ل سه‌ر خوه بكه‌ن، هنده‌ك ناكۆكی په‌یدابوون و هژماره‌ك كه‌س ده‌ركه‌فتن د ناڤا شۆڕه‌شێ دا و ل دوماهیێ هه‌ر ڤه‌گه‌ڕیانه د
ناڤ شۆڕه‌شێ پشتی ١١ی ئادارا سالا ١٩٧٠یێ، شۆڕه‌شێ هه‌موو ده‌ڤه‌ر ڤه‌گرتن و تنێ ده‌ڤه‌ره‌ك نه‌ڤه‌گه‌رت بۆ ده‌مێ ١٤ سالان شۆڕه‌شێ ڤه‌كێشا، ب درێژاهیا سالێن شۆڕه‌شێ چه‌ندین گه‌ڕێن دانوستاندنان و شه‌ڕان د ناڤبه‌را شۆڕه‌شێ و حوكمه‌تا ئیراقێ دا په‌یدابوون، له‌وڕا ژی شۆڕه‌شا ئیلوونا مه‌زن ژ شۆڕه‌شێن به‌رێ یا به‌رفره‌هتربوو”.
ل دۆر رۆلێ نۆشدارێن شۆڕه‌شێ دكتۆر مه‌حموود عوسمان گۆت” ده‌ستپێكێ تنێ ئه‌م دوو نۆشداربووین مه په‌یوه‌ندی ب شۆڕه‌شا ئیلوونا مه‌زن كر وه‌ك نۆشدارێن تایبه‌تمه‌ند ئه‌وژی ئه‌ز ل ده‌ڤه‌را بارزان بووم و دكتۆر ئه‌حمه‌د كه‌مال شالی كو ئه‌و ل باره‌گایێ مه‌كته‌با سیاسی بوو ، ئه‌ڤه لسالا ١٩٦٣یێ ئه‌و سالا زۆرترین شه‌ڕ تێدا هاتیه ئه‌نجامدان، ده‌ستپێكا شۆڕه‌شێ هژمارا نۆشدار و كه‌سێن شاره‌زا د بیاڤێ ساخله‌میێ دا گه‌له‌ك یا كێمبوو، به‌لێ ل سالا ١٩٧٤ێ پشتی ده‌ستپێكرنا شه‌ری نێزیكی ١١٠ نۆشدار مه هه‌بوون وه‌ك نۆشدارێن شۆڕه‌شێ، نۆشدارێن شۆڕه‌شێ تنێ خزمه‌تا پێشمه‌رگه‌ی نه‌دكر به‌لكو سه‌ره‌ڕای ئه‌ركێ چاره‌سه‌ركرنا پێشمه‌رگه‌ی ژلایێ ساخله‌می ڤه شۆڕه‌شا ئیلوونێ خزمه‌تێن مه‌زن پێشكه‌شی وه‌لاتیێن سڤیل دكرن، پێدڤیێن چاره‌سه‌ركرنێ گه‌له‌ك د سنوردار بوون ب رێیێن جودا پێدڤیێن ساخله‌می ده‌ست شۆڕه‌شێ دكه‌فتن ژوان ژی ژ ئیران و توركیا دهاتن هنده‌ك ژی ژلایێ رێكخستنێن شۆڕه‌شێ ڤه د ناڤا باژێڕان دگه‌هشتنه دناڤ شۆره‌شێ دا”.
