مه‌سرور بارزانی ل گه‌ل عه‌مار حه‌كیم و به‌رهه‌م سالح دوپاتی ل قووناغا پشتی هه‌لبژارتنان كر

عه‌مار حه‌كیم سه‌رۆكێ‌ به‌ره‌یێ‌ حیكمه‌ یێ‌ نیشتمانی و به‌رهه‌م سالح سه‌رۆك كۆمارێ‌ ئیراقێ‌ جودا په‌یوه‌ندی ب مه‌سرور بارزانی سه‌رۆكێ‌ حوكمه‌تا هه‌رێما كوردستانێ‌ كر.

سه‌رۆكێ‌ حوكمه‌تا هه‌رێما كوردستانێ‌ د په‌یوه‌ندیا ل گه‌ل عه‌مار حه‌كیم دا، دانوستاندن ل دۆر پرۆسا ده‌نگدانێ‌ بۆ هه‌لبژارتنێن جڤاتا نوونه‌رێن ئیراقێ‌ كر و هه‌دو ئالی خوه‌شحالبوون كو ب شێوه‌كێ‌ ئارام و هێمن برێڤه‌چوو. هه‌روه‌سا خواست كو ئه‌نجامێن هه‌لبژارتنان د به‌رژه‌وه‌ندیا پێكهاتێن جودا و هه‌موو گه‌لێن ئیراقێ‌ دا بن و ببنه‌ ئه‌گه‌رێ‌ سه‌قامگیربوونا ره‌وشا ئیراقێ‌.

ژ ئالیه‌كێ‌ دیڤه‌، سه‌رۆك كۆمارێ‌ ئیراقێ‌ ب هه‌لكه‌فتا سه‌ركه‌فتنا پرۆسا هه‌لبژارتنان پیرۆزباهیا سه‌رۆكێ‌ حوكمه‌تا هه‌رێما كوردستانێ‌ كر و هه‌لبژارتن ب پرۆسه‌كا سه‌ركه‌فتی هه‌ژمارتن، هه‌روه‌سا سه‌رۆك كۆماری پیرۆزباهی ل سه‌رۆكێ‌ حوكمه‌تێ‌ كر بۆ وان ئه‌نجامێن پارتی ب ده‌ستڤه‌ ئیناین.

هه‌ردو ئالیان دوپات كر كو پێدڤیه‌ هه‌موو لایه‌ن ب زووترین ده‌م ده‌ست ب دانوستاندنان بكه‌ن و ب هه‌ڤكاری و هه‌ماهه‌نگی كار بكه‌ن بۆ وێ‌ چه‌ندێ‌ ئه‌نجامێن هه‌لبژارتنان بێخنه‌ د خزمه‌تا به‌رژه‌وه‌ندیا هه‌رێما كوردستانێ‌ و هه‌موو ئیراقێ‌ و خزمه‌ته‌كا ژ هه‌ژی یا هه‌موو گه‌لێن ئیراقێ‌ بكه‌ن.