گوژمه‌كێ پاره‌ی بۆ جادده‌یا نێڤده‌وله‌تی یا ئیبراهیم خه‌لیل هاته ته‌رخانكرن
عه‌لی حاجی:
سه‌رپه‌رشتێ ئیداره‌یا سه‌ربخوه یا زاخۆ بۆ رۆژناما ئه‌ڤرۆ دیار كر، ب گوژمێ ملیاره‌ك و 332 ملیۆن دیناران ژلایێ سه‌رۆكێ حكومه‌تا هه‌رێما كوردستانێ ڤه بۆ رۆناهیكرن و جوانكرنا جادده‌یا سه‌ره‌كی یا ئیبراهیم خه‌لیل هاتینه ته‌رخانكرن.
گوهدار شێخۆ، سه‌رپه‌رشتێ ئیداره‌یا سه‌ربخوه یا زاخۆ گۆت: “پشتی بزاڤێن مه‌یێن به‌رده‌وام، ئه‌م شیاین ره‌زیبوونێ بۆ رۆناهیكرن و جوانكرنا جادده‌یا نێڤده‌وله‌تیا ئیبراهیم خه‌لیل ب ده‌ستخوه‌ڤه بینین و سه‌رۆكێ حكومه‌تێ گوژمێ ملیاره‌ك و 332 ملیۆن دیناران بۆ ڤێ مه‌به‌ستێ ته‌رخانكرن، هه‌ر چه‌نده به‌ری نوكه سایده‌كێ وێ جادده‌یێ هاتبوو قێركرن، به‌لێ نوكه دا وێ جادده‌یێ زێده‌تر پێدڤی ب جوانكاریێ و زێده‌كرنا رێژه‌یا كه‌سكاتیێ هه‌یه، ژ به‌ركو ئه‌و جادده‌یه‌كا گرنگ و نێڤده‌وله‌تی یه و ئێدی دێ گرنگیێ ژی ب وێ جادده‌یێ ده‌ین، پشتی قووناغا ئێكێ یا رۆناهیكرنا وێ جادده‌یێ ب دووماهی دهێت، دێ قووناغا دویێ ژی هه‌بیت”.
ناڤهاتی گۆتژی: “به‌ری نوكه ژی سه‌رۆكێ حكومه‌تێ گوژمێ هه‌شت ملیار دیناران بۆ نووژه‌نكرنا وێ جادده‌یێ ته‌رخانكربوون و ئه‌ڤه وێ چه‌ندێ دگه‌هینیت كو ئه‌و جادده‌یا نێڤده‌وله‌تی بۆ حكومه‌تا هه‌رێما كوردستانێ یا گرنگه”.
