كۆنفرانسه‌ك ل دۆر پرسا جینۆسایدا گه‌لێ كورد دێ هێته ئه‌نجامدان
بڕیاره ل ده‌ستپێكا ئه‌ڤ ساله كۆنفڕانسه‌ك ل دۆر پرسا جینۆسایدێ بهێته ئه‌نجامدان و سه‌رۆكا لژنا شه‌هید و ئه‌نفالكریان ژی ئاشكرا كر، هه‌رێما كوردستانێ كار ل سه‌ر وێ چه‌ندێ دكه‌ت، كو ل هه‌موو جیهانێ تاوانێن دژی گه‌لێ كورد ب جینۆساید بهێنه ناساندن.
سه‌وسه‌ن گه‌ردی، سه‌رۆكا لژنا شه‌هید و ئه‌نفالكریان ل په‌رله‌مانێ كوردستانێ دیار كر، بڕیاره ل ده‌ستپێكا ئه‌ڤ ساله كۆنفڕانسه‌ك ل دۆر پرسا جینۆسایدێ بهێته ئه‌نجامدان و تێدا كه‌سێن بسپۆر و شاره‌زا دێ هژماره‌كا ڤه‌كۆلینان ل دۆر جینۆسایدكرنا گه‌لێ كورد ل سه‌رده‌مێ رژێما به‌عسا ژ ناڤچوویی پێشكێش كه‌ن و به‌رهه‌ڤی دهێنه‌كرن بۆ دیاركرنا رۆژا ئه‌نجامدانا كۆنفڕانسی.
سه‌وسه‌ن گه‌ردی بۆ ئاژانسا خانی گۆت: “ئه‌م دێ بزاڤان كه‌ین ل هه‌موو جیهانێ ئه‌و كاره‌ساتێن ب سه‌رێ گه‌لێ مه دا هاتین ب جینۆساید بده‌ینه نیاسین، چونكو ل گۆره‌ی پیڤه‌رێن نێڤده‌وله‌تی چه‌ندین كاره‌ساتێن ب سه‌ر ملله‌تێ كورد دا هاتین هه‌موو جینۆسایدن”.
سه‌رۆكا لژنا شه‌هید و ئه‌نفالكریان ل په‌رله‌مانێ كوردستانێگۆتژی: “ل په‌رله‌مانێ فڕه‌نسا كار ل سه‌ر پرسا ب جینۆساید ناساندنا تاوانێن دژی گه‌لێ كورد دهێته‌كرن و حوكمه‌تا هه‌رێما كوردستانێ ل به‌ره ل چه‌ندین په‌رله‌مانێن وه‌لاتێن دی ژی جینۆسایدا ملله‌تێ كورد بهێته په‌سه‌ندكرن”.
