سه‌رۆكێ هه‌رێما كوردستانێ ل گه‌ل باليۆزێ ئه‌مريكا ل عیراقێ كۆمبوو 
نێچيرڤان بارزانى، سه‌رۆكێ هه‌رێما كوردستانێ، پێشوازى ل ماتيوو توله‌ر باليۆزێ ئه‌مريكا و شاندێ ل گه‌ل دا كر. د وێ كۆمبوونێدا داوی پیشهاتێن ره‌وشا سياسی یا عيراقێ، ب تايبه‌تی پشتی بريارا دادگه‌ها بلند یا فيدرالى ده‌رباره‌ى كه‌رتێ نه‌فت و گازێ ل هه‌رێما كوردستانێ هاتنه به‌حس كرن. نێچيرڤان بارزانى خواندنا خوه بۆ چاوانییا ده‌رچوونا وێ بريارێ و پێنگاڤ بۆ چاره‌سه‌ریێ خستنه به‌رچاڤ، دووپات كر كو ئه‌ڤ قووناغا عيراق تێدا دبوریت، وه‌سا دهێته خواستن دادگه‌ها فيدرالى و هه‌موو لايه‌نێن عيراقی لدووڤ چاره‌سه‌ركرنا كێشان بگه‌رن. هه‌روه‌سا گۆت ژی: هه‌رێما كوردستانێ هه‌رده‌م پابه‌نديیا خوه بۆ چاره‌سه‌ركرنا كێشان ل گه‌ل حكومه‌تا فيدراليیا عيراقێ ل سه‌ر بنه‌مایێ ده‌ستووری نيشان دایه و دووپات كرییه كو ئه‌ڤ جۆره پێنگاڤه خزمه‌تا سه‌قامگيرییا وه‌لاتی ناكه‌ن، له‌وما دڤێت ئه‌م هه‌موو بۆ چاره‌سه‌رى و پاراستنا سه‌قامگيریێ كار بكه‌ين.هه‌ردو ئالی د هه‌ڤرا بوون كو پشتی هه‌لبژارتنێن ئۆكتۆبه‌را بوری یێن جڤاتا نوونه‌ران، دۆستێن عيراقێ چاڤه‌رێی پێكئینانا حكومه‌تێ و سه‌قامگيریێ و به‌ره‌ڤ پێشچوونا پرۆسا ديموكراسيێ نه ل عيراقێ، هه‌روه‌سا دووپاتی ل گرنگيیا هاريكارى و هه‌ماهه‌نگيیێ دناڤبه‌را هه‌رێما كوردستانێ و حكومه‌تا فيدرالی یا عيراقێ كرییه” ب تايبه‌تى بۆ به‌رهنگاربوونا تيرۆرێ.هه‌روه‌سا هه‌لبژارتنێن هه‌رێما كوردستانێ، ته‌وه‌ره‌كێ دیتر یێ وێ كۆمبوونێ بوو، سه‌رۆك نێچيرڤان بارزانى دووپاتی ل هندێ كر” كو سه‌رۆكاتییا هه‌رێما كوردستانێ ل گه‌ل لايه‌نێن په‌يوه‌ندار كار دكه‌ت و ل گه‌ل لايه‌نێن سياسی د په‌يوه‌نديێ دایه بۆ هندێ هه‌لبژارتن ل ده‌مێ خوه دا بهێنه ئه‌نجام دان. پاشی هه‌ردو ئالییان ره‌وشا پێشمه‌رگه‌یی و پێنگاڤێن چاكسازیێ و پرۆسا رێكخستنێ و پشتگيريیا ئه‌مريكا و وه‌لاتین ديتر یێن دۆست به‌حسكرن و هه‌ڤرا بوون” كو پێنگاڤێن باش د وی بیاڤی دا هاتینه هاڤێتن، وێ پرۆسێ هێشتا كارێ زێده‌تر دڤێت و دڤی بیاڤی دا به‌رده‌واميیا ئه‌مريكا و دۆستێن هه‌رێما كوردستانێ یا پێدڤییه.كه‌رتێ ئابوورى و گرنگيیا ئارامى و سه‌قامگيریێ بۆ هاندانا سه‌رمايه‌گوزارى و وه‌به‌رهێنانا بيانى ل هه‌رێمى كوردستانێ و عيراقێ، گرنگيیا سه‌ربه‌خۆييا دادگه‌هان ل عيراقێ و هه‌رێما كوردستانێ و به‌رده‌واميیا هاريكاريیا هه‌ڤپشك یا عيراقێ و جڤاكێ نێڤده‌وله‌تى، چه‌ند ته‌وه‌رێن دیتر یێن وێ كۆمبوونێ بوون.
