نێچیرڤان بارزانى ل گه‌ل قوتابی و لاوێن كوردستانێ كۆمبوو
نێچیرڤان بارزانى، جێگرێ سه‌رۆكێ پارتى دیموكراتى كوردستان، ئه‌ڤرۆ 16-2-2022 د دوو دیدارێن جودا دا ل گه‌ل سكرتاریه‌تا هه‌رئێك ژ ڕێكخراوا ئێكه‌تییا قوتابیێن كوردستانێ و ئێكه‌تییا لاوێن دیموكراتا كوردستانێ كۆمبوویه كو ئه‌ینیا بهێت، 18ى شوباتێ، شێست و نه‌هـ هه‌مین سالڤه‌گه‌را دامه‌زراندنا خۆ دێ پیرۆز كه‌ن. د كومبوونێدا ئه‌ڤین هرۆرى، ئه‌نداما سه‌ركردایه‌تیێ و به‌رپرسا ده‌سته‌یا ڕێكخراوا جه‌ماوه‌رى و پیشه‌یی و تاها به‌روارى، رێڤه‌به‌رێ نڤێسینگه‌ها جێگرێ سه‌رۆكێ پارتى دیموكراتى كوردستان ئاماده بوون، به‌رپرسێ ده‌سته‌یێ و سکرتێرێن هه‌ردوو ڕێکخراوان هووربوونێن كار وچالاكییان و پلان و به‌رنامه‌یێ كارێ خوه‌یێ داهاتى و ره‌وشا قوتابیان و لاوان ب گشتى دیاركر. جێگرێ سه‌رۆكى پیرۆزباهى ب هه‌لكه‌فتا سالڤه‌گه‌را دامه‌زراندنا ئێكه‌تیا لاوێن دیموكراتا كوردستانێ و ئێكه‌تییا قوتابیێن كوردستانێ كرن، ئاماژه ب هندێ كر ئێك ژ خۆشترین وێستگه‌هێن ژیانێ، ئه‌و سه‌رده‌مه بوو كو ل رێزێن ئێكه‌تییا قوتابییان و لاوێن دیموكراتا كوردستانێ خزمه‌ت كرییه.هه‌روه‌سا دووپاتى ل گرنگییا رۆلێ قوتابییان و لاوان ل كۆمه‌لگه‌ها كوردستانێ دا كره‌ڤه و هه‌ردوو رێكخراوان هاندا بۆ هندێ بزاڤان بكه‌ن باشتر ل ئاریشه و داخوازى و خه‌ون و دیتنێن قوتابییان و لاوێن كوردستانێ تێبگه‌هن ول ئاستێ دیتنێن ئه‌وان خزمه‌تێ بكه‌ن، بۆ ئه‌ڤێ ژى هه‌موو پشتگێرییه‌كێ بۆ ئه‌وان دووپاتكره‌ڤه. نێچیرڤان بارزانى، هه‌روه‌سا خۆشحالیا خوه ب ئاستێ هزر و ره‌وشه‌نبیرییا لاوان و قوتابییان ده‌ربرى و دوپاتى كر كو ئاستێ ره‌وشه‌نبیرى و بیركرنه‌ڤه و دیتنا لاوێن كوردستانێ جهێ شانازیێ یه و دشێن خزمه‌ته‌كا باشتر بۆ داهاتى ژى بكه‌ین، هه‌روه‌سا تێگه‌یشتن ل رووداو و پێشهاتێن خوه گونجاندنێ ل گه‌ل پێشكه‌فتنێن بله‌ز ل پێشینه‌یان ل قه‌له‌م دا، بۆ هندێ بشێن ب رۆلێ پێشه‌نگانه خوه ببینن.د پشكه‌كا دییا كۆمبوونێدا جێگرێ سه‌رۆكى رووناهى خسته سه‌ر گرنگییا رۆلێ هه‌ردوو رێكخراوێن لاوان و قوتابییان ب گشتى ل كووركرنا ته‌بایێ و پێكڤه ژیانێ و به‌لاڤكرنا كولتوورێ هاریكاریێ و نه توندوتیژیێ و پاراستنا مافێن ئافره‌تێ و هاریكاریكرنا گه‌نجان بۆ ڤه‌دیتنا ده‌لیڤێن كارى و خوه ئاڤاكرنێ و ره‌خنه و ره‌خنه ل خوه گرتن و پشكدارییا كارا ل به‌ره‌ڤپێشڤه‌برنا كوردستانێ دا.ژلایێ خوه ڤه هه‌ردوو سكرتاره‌تیێن ئێكه‌تییا قوتابیێن كوردستان و ئێكه‌تییا لاوێن دیموكراتا كوردستانێ، خۆشحالیا خوه ب ڤێ دیدارا جێگرێ سه‌رۆكى ده‌ربرى و سوپاسى و پێزانینێن خوه و ئه‌ندام و لایه‌نگرێن خوه بۆ به‌رده‌وامییا پشتگیریا نێچیرڤان بارزانى ل هه‌ردوو ته‌خێن لاوان و قوتابییان ده‌ربرى و دوپاتى ل هندێ كر كو ب گه‌رمى ل خزمه‌تكرنا هه‌ردوو ته‌خان و كوردستان ب گشتى دێ به‌رده‌وام بین.
