١- دادگه‌ها ئیتیحادی بابه‌تێ سكالایا مووچه‌یێن پاشكه‌فت كری , ره‌فز كر و گۆت هه‌رێمێ ماف هه‌یه لسه‌ر ڤی بابه‌تی یاسایێن تایبه‌ت ب خۆ هه‌بن ..!ئه‌ڤ بڕیاره نه ژباوه‌ری ب مافێ هه‌رێمێ هات به‌لكۆ دادگه‌هێ له‌وڕا ئه‌ڤ سكالایه ره‌فز كر هه‌تا بۆ خۆ ئابڕۆیێ بكڕیت و بێژیت ئه‌م دادپه‌روه‌رین .٢- ئه‌و كه‌سێن نهۆ دلخۆشن ب بڕیارا دادگه‌هێ لدژی مافێ هه‌رێما كوردستانێ , هه‌ر ئه‌ون ئه‌وێن ل خیانه‌تا شازده‌ی ئۆكتوبه‌رێ تلیلی بۆ هاتنا حه‌سه‌ن پلایس و مورته‌زا په‌قپه‌قۆكی لێددان و كه‌یفخۆش بوون ب داگیركرنا كه‌ركووكێ .٣- هه‌موو هێز و حیزبێن كوردستانیێن كو ده‌ستخۆشی ل دادگه‌هێ دكه‌ن , ب دروستی دسه‌لمینن كو خودانێ كوردستانێ و به‌رگریكارێن كوردستانێ ب تنێ سه‌رۆك بارزانی و ئه‌ندامێن پارتینه .ئه‌و وه‌سا هزر دكه‌ن ئه‌گه‌ر بڕیار لگۆره‌ی حه‌زا میحوه‌رێ موقاوه‌مه‌تێ چووه سه‌ری , و نه‌فت ژ ده‌ستێ كوردستانیان ده‌ركه‌فت , ئه‌ڤه سه‌ركه‌فتنه بۆ وان . چنكۆ سه‌ركه‌فتنا وان د دۆڕاندنا كوردستانێ دایه .٤- هیچ فیدڕالییه‌كا سیاسی بێی سه‌رخۆبوونا ئابوری سه‌رناگریت . دڤێت كوردستانی داخوازا هه‌موو مافێن خۆ بكه‌ن . كی دێ حكومه‌تا عێراقێ دادگه‌هی كه‌ت لسه‌ر جێبه‌جێ نه‌كرنا ماده‌یا سه‌دوچل و پێنجی ماده‌یێن دی یێن ده‌ستوری ؟ئه‌گه‌ر ئه‌ڤه دادگه‌هه‌كا راستگۆ بایه دڤیا بوو به‌ری ڤێ بڕیارێ لدژی حكومه‌تا كوردستانێ بده‌ت , بڕیارا سزادانا حكومه‌تێن عێراقێ بده‌ت لسه‌ر نه‌داڕشتنا یاسایا نه‌فت و گازێ . ئایا ڤێ بێدادگه‌هێ هیچ بڕیاره‌ك بۆ ئیدانه‌كرنا حكومه‌تێن عێراقێ ده‌ركرییه لسه‌ر پێك نه‌هینانا جڤاتا فیدڕالی ؟٥- ئه‌و كوردێن لدژی حكومه‌تا كوردستانێ ده‌ستخۆشیێ ل بێدادگه‌ها ئیتیحادی دكه‌ن , پێویست بوو لشوینا وێ , سكالایێ لسه‌ر حه‌یدر عه‌بادی تۆمار بكه‌ن بۆ بكار ئینانا سوپایێ عێراقێ و له‌شكه‌رێ بیانی بۆ ئێكلا كرنا كێشه‌یێن ناڤخۆیی .٦- ئه‌وێن كو حكومه‌تا كوردستانێ تاوانبار دبینن , ئایا هیچ شاشی و تاوان و كێماسییه‌كێ د حكومه‌تا عێراقێدا دبینن یا نه ؟ ئایا وان چ جاران ره‌خنه‌یه‌ك یان گۆتاره‌ك لدژی شاشییه‌كا ده‌ستهه‌ڵاتدارێن عێراقێ دیار كرییه ؟!ل داویێ دبێژم ئه‌ڤ قۆناغه ژی دێ ده‌رباز بیت . حكومه‌تا كوردستانێ چاوا شه‌ڕێ داعشێ و حه‌شدێ و دۆرپێچا ئابوری و دارایی یا مالكی و یێن دویڤدا ده‌رباز كری , دێ ڤێ ئاڵۆزیێ ژی ده‌رباز كه‌ت .
Ali Awni
