بابه‌كر زێباری: پێدڤیه‌ حوكمه‌تا ئیراقی پرسا هێرشێن مووشه‌كی ل سه‌ر هه‌ولێرێ چاره‌سه‌ر بكه‌ت

شیره‌تكارێ له‌شكری یێ سه‌رۆكێ هه‌رێما كوردستانێ راگه‌هاند، ئه‌وێن هه‌ولێرێ دكه‌نه‌ ئارمانج كۆمه‌كا گرۆپانه‌ كو چاڤێ وان ب قه‌وارێ هه‌رێما كوردستانێ نارابیت و حوكمه‌تا ئیراقێ یا به‌رپرسیاره‌ و پێدڤیه‌ حوكمه‌تا نوو ل ئیراقێ دهێته‌ پێكئینان وێ كێشێ چاره‌سه‌ر بكه‌تو نابیت ره‌وشا ده‌ڤه‌رێن كوردستانی یێن ده‌رڤه‌ی ئیدارا هه‌رێما كوردستانێ ب شێوه‌ی بیت و پێدڤیه‌ بهێته‌ كونترۆلكرن.

بابه‌كر زێباری، شێره‌تكارێ له‌شكری یێ سه‌رۆكێ هه‌رێما كوردستانێ گۆت” ئه‌و هێرشێن مووشه‌كی یێن به‌رده‌وام دژی هه‌رێما كوردستانێ و ئارمانج گرتنا هه‌رێمێ بۆ وێ چه‌ندێ ڤه‌دگه‌ریت كو ئه‌و گرۆپ دژی قه‌وارێ هه‌رێما كوردستانێ نه‌ و چاڤێن وان پێ نارابیت، چونكه‌ ناخوازن هه‌رێما كوردستانێ پێش بكه‌ڤیت و ئارامی لێ هه‌بیت، له‌وما به‌رده‌وام هه‌لێرێ مووشه‌ك باران دكه‌ن”.

شێره‌تكارێ له‌شكری یێ سه‌رۆكێ هه‌رێما كوردستانێ ئه‌وژی گۆت” ئه‌وێن وی كاری ژی دكه‌ن پشكه‌ك ژ گرۆپێن حه‌شدا شه‌عبی نه‌ كو گوه ب كه‌سێ ناكه‌ن و دژی ده‌وله‌تا خوه‌ یا ئیراقێ ژی نه‌، چونكه‌ هه‌تا ئه‌و گرۆپ فرۆكخانا به‌غدا یا نێڤده‌وله‌تی ژی مووشه‌ك باران دكه‌ن”.

بابه‌كر زێباری ئاماژه‌ كر” پێدڤیه‌ حوكمه‌تا داهاتی یا ئیراقێ وێ كێشێ چاره‌سه‌ر بكه‌ت و نوكه‌ ژی حوكمه‌تا ئیراقێ یا به‌رپرسیاره‌، چونكه‌ ئه‌و جهێ گرۆپێن ناڤبری مووشه‌كان ئاراسته‌ی هه‌رێما كوردستانێ دكه‌ن حوكمه‌تا ئیراقێ یا ژێ به‌رپرسیاره‌، به‌لێ ئه‌و جۆره‌ گرۆپه‌كن تنێ ب ئاشكرا و ب رێیا ته‌له‌ڤزیۆنان ڤه‌ ئاخڤتنان دژی سه‌رۆك وه‌زیرێن ئیراقێ ژی دبێژن، به‌لێ پێدڤیه‌ حوكمه‌تا نوو یا ئیراقێ وێ ره‌وشێ چاره‌سه‌ر بكه‌ت و ده‌ڤه‌رێن كوردستانێ یێن ده‌رڤه‌ی ئیدارا هه‌رێما كوردستانێ كونترۆل بكه‌ت ژ وان جۆره‌ گرۆپان”.