چاڤدێره‌كێ سیاسی یێ باكورێ كوردستانێ دیار دكه‌ت كو ده‌وله‌تا توركیا ل سه‌ر بنه‌مایێ دژبه‌ریا مافێن كوردان هاتیه ئاڤاكرن، ژ به‌ر هندی ژی هه‌تا سیسته‌مێ توركیا نه‌هێته گوهۆرین پرسا كوردی ژی چاره‌سه‌ر نابیت، چونكو بابه‌ت گوهۆڕینا حوكمه‌تان نینه.
ئیبراهیم گوچلوو نڤیسه‌ر و چاڤدێرێ سیاسی یێ باكورێ كوردستانێ د دیداره‌كا تایبه‌ت دا بۆ رۆژناما ئه‌ڤرۆ دیار كر كو نها ل توركیا بابه‌تێ هه‌لبژارتنێن پێشوه‌خت گه‌له‌ك گه‌رم بوویه، پارتێن ئۆپۆزسیۆنێ داخواز دكه‌ن كو هه‌لبژارتن بهێنه كرن و حوكمه‌ت ژی دبێژیت دێ هه‌لبژارتن د ده‌مێن خوه دا هێنه كرن، هه‌ر دو ئالی ژی نها كار ل سه‌ر هندێ دكه‌ن كو بشێن ده‌نگێن كوردان بۆ خوه كۆم بكه‌ن، ئاشكرایه د چه‌ندین هه‌لبژارتنێن بۆری دا ئاكپارتیێ شیا ب ده‌نگێن كوردان بهێته سه‌ر ده‌ستهه‌لاتێ لێ نها ره‌وش ل توركیا ب ته‌مامی هاتیه گوهۆڕین و گۆت: (هه‌م ئاكپارتی و هه‌م ژی پارتێن ئۆپۆزسیۆنێ ب چو ره‌نگه‌كێ به‌حسێ چاره‌سه‌ركرنا پرسا كوردی ناكه‌ن، تنێ ب هنده‌ك داخۆیانیان وان دڤێت جاره‌كا دی كارتێكرنێ ل هه‌ستێ كوردان بكه‌ن و ئارمانجا وان ژی تنێ بده‌ستڤه‌ئینانا ده‌نگێن كوردانه).
ناڤهاتی راگه‌هاند كو ب سالانه پرسا كوردی ل توركیا نه‌هاتیه چاره‌سه‌ركرن، گه‌له‌ك حوكمه‌ت و ده‌ستهه‌لات ل توركیا هاتنه سه‌ر كار و هنده‌ك ژ وان سۆز دانه كوردان كو دێ پرسا كوردی ل توركیا هێته چاره‌سه‌ركرن، لێ هه‌تا نها ژی نه‌شیان چو بكه‌ن، ژ به‌ر كو پرسا كوردی ب رێیا گوهۆڕینا حوكمه‌تان ل توركیا ناهێته چاره‌سه‌ركرن، ده‌وله‌تا توركیا ل سه‌ر بنه‌مایێ دژبه‌ریا مافێن كوردان هاتیه ئاڤاكرن، ده‌وله‌ته‌ك نه‌ته‌وه‌یی یه و دبێژیت ل توركیا كورد نینن، ده‌مێ ده‌وله‌ته‌ك بێژیت كورد نینن وی ده‌می دێ چاوا شێت پرسا كوردی ژی چاره‌سه‌ر كه‌ت، هه‌لوه‌ستێ ئاكپارتیێ ژی هه‌روه‌سا بوویه و تشتێ ئاكپارتیێ د چه‌ندین سالێن بۆری دا كری تنێ بۆ هندێ بوویه پشته‌ڤانیا كوردان بده‌ستڤه بینیت، چونكو ئاكپارتیێ ژی نه‌شیا گۆتارا ده‌وله‌تا توركیا ل هه‌مبه‌ر گه‌لێ كورد ل توركیا ب گوهۆڕیت.
نڤیسه‌ر و چاڤدێرێ سیاسی یێ باكورێ كوردستانێ ئه‌و یه‌ك ژی دیار كو ل توركیا ده‌وله‌تێ ب كوشتنێ و ژناڤبرنا كوردان خواستیه پرسا كوردی چاره‌سه‌ر بكه‌ت، ل هه‌مبه‌ر ده‌وله‌تا توركیا كوردان چه‌ندین سه‌رهلدان كرن و سه‌رهلدانێن كوردان ب خوونێ هاتنه ژناڤبرن، ژ به‌ر هندێ ژی پرسا كوردی ل توركیا پتر ئالۆز بوویه و ب گوهۆڕینا حوكمه‌ته‌كێ پرسا كوردی ناهێته چاره‌سه‌ركرن، دڤێت ئه‌م باش بزانین هه‌كه ب جهێ ئاكپارتیێ پارته‌كا دی ژی ل توركیا بهێته سه‌ر ده‌ستهه‌لاتێ هه‌لوه‌ستێ وێ ل هه‌مبه‌ر كوردان ژ یێ ئاكپارتیێ باشتر نابیت، چونكو دڤێت گوهۆڕینێن بنگه‌هین ل توركیا بهێنه كرن و گۆت: (به‌ری هه‌ر تشته‌كێ دڤێت هه‌بوونا كوردان ل توركیا ب فه‌رمی بهێته قه‌بوولكرن، دڤێت ده‌وله‌تا توركیا ژ به‌ر كۆمكوژیێن كوردان ب فه‌رمی داخوازا لێبۆرینێ بكه‌ت، گه‌له‌ك تشتێن دی ژی هه‌نه كو دڤێت بهێنه كرن، ژ به‌ر هندێ ژی ئه‌ز دبێژم بابه‌ت گوهۆڕینا حوكمه‌تان نینه، چونكو پرسا كوردی ل توركیا پرسه‌ك گه‌له‌ك مه‌زنه و ب گوهۆڕینا حوكمه‌تان ناهێته چاره‌سه‌ركرن).
چاڤدێرێ سیاسی ئه‌و یه‌ك ژی دیار كر هه‌كه نها ل توركیا هه‌لبژارتن ژی بهێنه كرن و حوكمه‌ت بهێته گوهۆرین ژی چو گوهۆرینه‌ك د بابه‌تێ پرسا كوردی دا ناهێته كرن، چونكو د چه‌ندین سالێن بۆری دا هه‌موو پارتێن سیاسی پرسا كوردی ل دژی هه‌ڤدو بۆ كۆمكرنا ده‌نگان بكار ئیناینه و چو پرۆژه‌یێن وان بۆ چاره‌سه‌ركرنا پرسا كوردی نه‌بووینه.
