هێمن هه‌ورامی هیچ بیانوویه‌كا سیاسی بۆ كاراكرنا كۆمسیۆنێ نه‌مایه
جێگرێ سه‌رۆكێ په‌رله‌مانێ كوردستانێ دووپاتی ل سه‌ر گرنگیا ئه‌نجامدانا هه‌لبژارتنێن په‌رله‌مانێ كوردستانێ كر د ژڤانێ خوه یێ دیاركری دا ئه‌وژی 1/10/2022.
هێمن هه‌ورامی، جێگرێ سه‌رۆكێ په‌رله‌مانێ كوردستانێ د چارچۆڤێ پێشوازیێ ل كلێمنس زێمتنه‌ر، كونسۆلێ گشتیێ ئه‌لمانیا ل هه‌رێما كوردستانێ گۆت” پێدڤیه ل نێزیكترین روونشتنا په‌رله‌مانێ كوردستانێ دا خواندنا ئێكێ بۆ راستڤه‌كرنا قانوونا هه‌لبژارتنان و كاراكرنا كۆمسیۆنا بلند یا هه‌لبژارتن و راپرسیان ل هه‌رێما كوردستانێ و ره‌وشا گشتی یا داراییا هه‌رێمێ بهێته كرن، بۆ وێ چه‌ندێ رێره‌وا په‌یره‌وی و قانوونی یا خوه بگریت”.
هێمن هه‌ورامی گۆت ژی” پێدڤی بوو كۆمسیۆنا بلند یا سه‌ربخوه یا هه‌لبژارتن و راپرسیان هاتبا كاراكرن و جهێ كۆمسیاران ژی هاتبا پركرن، هه‌ڤده‌م ئه‌و بابه‌ت و یاداشت و راپۆرتێن گرێدای ب ره‌وشا دارایی و كارێ په‌رله‌مانی بهێنه خستن دناڤ به‌رنامێ كارێ روونشتنا په‌رله‌مانی، چونكه هیچ بیانوویه‌كا سیاسی بۆ پاشخستنا كاراكرنا كۆمسیۆنێ نه‌مایه”.
سه‌باره‌ت مافێن پێكهاتان ژی، جێگرێ سه‌رۆكێ په‌رله‌مانێ كوردستانێ دووپاتی ل سه‌ر وێ چه‌ندێ كر كو دڤێت ماف و نوونه‌راتیا پێكهاتان دپاراستی بن و خواستا پێكهاتان ژ فراكسیۆنان جودا جودا ل په‌رله‌مانی و ده‌زگه‌هێن سیاسی و ئایینی و رێكخراوێن جڤاكێ مه‌ده‌نی و پژارده‌یا پێكهاتان و جه‌ماوه‌رێ وان ل سه‌ر شێوه و جۆر و كورسیێن وان ژ ئالیێ وان ب خوه‌ڤه بریار ل سه‌ر بهێته دان.
