مه‌حما خه‌لیل: ژبه‌ر ره‌وشا شنگالێ دێ داخوازا روونشتنه‌كا بله‌ز یا جڤاتا نوونه‌ران كه‌ین
ئه‌ندامه‌كێ جڤاتا نوونه‌رێن ئیراقێ ژ فراكسیۆنا پارتی دیموكراتی كوردستان راگه‌هاند، ژبه‌ر تێكچوونا ره‌وشا شنگالێ دێ داخوازا روونشتنه‌كا بله‌ز یا جڤاتا نوونه‌رێن ئیراقێ كه‌ین، هه‌روه‌سا ئاماژه‌كر گرۆپێن چه‌كدار بۆ خاترا ئێزدیان نه‌هاتینه د شنگالێ دا و نوكه شنگال و ئاخا وێ و داگیركرینه.
مه‌حما خه‌لیل، ئه‌ندامێ جڤاتا نوونه‌رێن ئیراقێ ژ فراكسیۆنا پارتی گۆت” گرۆپێن چه‌كدار شنگال و ئاخا وێ و خه‌لكێ وێ یێن داگیركرین و چۆل ناكه‌ن بتنێ وان دڤیت شه‌ر بهێته كرن له‌ورا ژی نوكه خه‌لكێ شنگالێ چ جاران باوه‌ریێ ب PKK نائینن به‌لگه ژی ل سه‌ر ڤێ چه‌ندێ ئه‌وه ل هه‌لبژارتنێن بۆرێ ییێن جڤاتا نوونه‌رێن ئیراقێ خه‌لكێ شنگالێ ب ده‌نگێن خوه گرۆپێن نه‌شه‌رعی سزادان وبه‌ربژارێن پارتی سه‌رخستن بۆ جڤاتا نوونه‌رێن ئیراقێ تاكو به‌رگریێ ژ كه‌یسا شنگالێ بكه‌ن، نوكه ژی خه‌لكی شنگالێ دژی PKK خوه‌نیشادانان دكه‌ت چونكو یێ گه‌هشتیه وێ باوه‌ریێ كو بتنێ PKK بۆ داگیركرنا ئاخا شنگالێ هاتیه وێ ده‌ڤه‌رێ”.
مه‌حما خه‌لیلی ئاشكه‌را كر ژی كو PKK بازرگانیێ ب شنگالێ دكه‌ت وخزمه‌تێ بۆ ده‌وله‌تێن بیانی دناڤ شنگالێ دا كه‌ت و PKK بۆ خاترا ئێزدیان نه هاتیه شنگالێ، به‌لكو بۆ مالوێرانیا ئێزدیان هاتیه وێ ده‌ڤه‌رێ وئه‌ڤه تشته‌كێ رۆهن وئاشكرایه ونوكه ژی PKK یا به‌رده‌وامێ ب جینوسایدا ئێزدیان دده‌ت و شنگالێ داگیر دكه‌ت”.
زێده‌تر گۆت” حه‌شدا شه‌عبی پشته‌ڤانیا PKK ل شنگالێ دكه‌ت وهه‌تاكو چه‌كدارێن وێ پێدڤیێن له‌شكری و مووچه‌ی ژ حه‌شدا شه‌عبی وه‌ردگرن و حه‌شدێ مه‌ره‌م یێن پێ هه‌ین له‌ورا ژی هه‌تا نوكه رێگریێ ل له‌شكرێ ئیراقێ دكه‌ن كو هێشتا نه‌شیایه ب ئه‌ركی خوه یێ نشتیمانی به‌رامبه‌ر PKK رابیت كو PKK زێده‌گاڤی ل سه‌ر له‌شكرێ ئیراقێ و سه‌روه‌ریا ئیراقێ كریه كو ئه‌و سه‌روه‌ری ل شنگالێ هاتیه بنپێكرن و PKK بزاڤێ دكه‌ت شه‌ره‌كێ نێڤده‌وله‌تی ل شنگالێ رووبده‌ت وئێزدیان تووشی مالویرانیێ بكه‌ت وخه‌لكێ سڤیل بهێته كوشتن”.
دیاركر ژی” ئه‌م ناخوازین شه‌رێ توركیا و PKK به‌ر ب شنگالێ بهێت ژئه‌گه‌رێ هه‌بوونا چه‌كدارین PKK له‌ورا دخوازێن PKK شنگالێ چۆل بكه‌ت وشه‌ر و مالویرانی جاره‌كا دێ ل شنگالێ روونه‌ده‌ت ورێز ل قوربانیێن ئێزدیان ل شنگالێ بهێته گرتن”.
مه‌حما خه‌لیل ئه‌وژی دیاركركو حوكمه‌تا ئیراقێ نه‌یا رژده بۆ بجهئینانا رێككه‌فتنا د ناڤبه‌را حوكمه‌تا هه‌رێما كوردستانێ و ئیراقێ دا ل دۆر شنگالێ و ئاساییكرنا ره‌وشا وێ كو ئه‌و رێككه‌فتن باشترین چاره‌سه‌ریه بۆ هه‌موو ئالۆزیان ل شنگالێ”.
خویاكر” پشتی دووماهیا هاتنا بێهنڤه‌دانا جه‌ژنا ره‌مه‌زانا پیرۆز دێ داخوازا روونشتنه‌كا بله‌ز یا جڤاتا نوونه‌رێن ئیراقێ هێته كرن كو یا تایبه‌ت بیت ب ره‌وشا شنگالێ ڤه”.
