كوڤان حسێن
دبێژن ئەوێن پرسگرێگا درست دكەن، بیاڤەكێ بۆ چارەسەریا وێ ل ئالیێ خو بتنێ دهێلن. پشتی سەد سالێن سایكس بیكو و بێ دەولەت كرنا كوردا و هندەك مللەتێن دی، شتی جەنگا جیهانیا ئێكی تازە بیرا هندێ دهێت كرن ئەڤ نەخشە ساخلەم نینە و ئەڤ وەلاتە ژی توشی هەرەسێ بونە و نەما بشێن خوە ئاڤا كەن و رێزدار بژین. دبێژن سەروكێ هەرێمێ داخازا چڤاتا ئاسایشێ كریە ل پرسێن هەولێر و بەغدا، دا كەسەكێ وەك هاریكار و ناڤبژینكار دیار بكەتن، بۆ هندێ دوماهیكێ بڤێ ئالوزیێ بینن, هەر چەندە نەتەوەێن ئێكگرتی یا سەركەفتی نەبویە ل هەمی وان پرسێن پێ هاتیە راسپاردن. لێ ئەگەر ئەڤ جولەكا سەروكێ هەرێمێ سەربگریت، پرسا نەتەوەیەك غەدر لێكری تازە دبیتە ڤە.
ئەو هەمی چارەسەرێن ڤان وەلاتان د سەد سالێن بوریدا گرتینە بەر، د ستەور و بێ كەلك بونە. وەك دیار ئێنگلیزا دەستێ دڤێ پرسێ دا هەی، چەوا دەست ل دروستكرنا ڤێ پرسێ دا هەیە، دبیت (ئەكسیرا) جارەسەركرنێ ژی ل لەندن بیت یان هەرچونە بیت ب دەست پێشخەریا وان پرسێن نوكە یێن كوردستانا عێراقێ ب نێڤ دەولەتی بێنە كرنێ.
وەك دیار تا نوكە عێراقێ وەك دەولەت هیچ رۆژەك سیاسی و ب پشتەڤانیەكا جەماوەری شەرعیەتەك سیاسی ڤە، هیج جارەكێ بۆ پرسا كوردی نە بویە، هەمی جارێ بەغدا ل دیف پرۆژەك كوردی هاتیە و هەمی شیان ژی داینە وی پرۆژەی ژ ناڤەروكێ ڤالاكەتن، وەك هەمی پرسێن بوری. لێ چڤاتا ئاسایشێ 30 سالە پرسا بیابانا روژئاڤا هێلای هەلاویستی و 70 سالە پرسا فلستنیێ ل جهێ خوەمایە و ب دهان پرسێن دی ژ كەشمیرێ تا دارفورێ تا فوكلاند و جهێن دی بێ چارەسەری، مانە ژ ئەنجامێ هێزا زلهێزا.
ئەڤ بریارە ژی دبیت ژ ڤالاهیێ نەهاتبیت، دبیت عێراقێ ژی پێخوش بیت، ب بریارەكا نێڤ دەولەتی بەرامبەر جەماوەرێ خوە خوە ژ ئیحراجێ خلاس كەن، ئەگەر تشتەك بسەرێ كوردستانێ دا چوو. باوەری دناڤبەرا پێكهاتێن عێراقێ دا نینە و نەمایە و هەمی رەنگ و تەرز هاتینە تاقیكرن, ئەڤ وەلاتە فاشلە یان ب هەرفیت یان سەروژنی ب هندەك بریارێن نێڤ دەولەتی بۆ جەند سالێن دی عەمرێ عێراقێ درێژ كەن.
