د ساله‌كێ دا 2658 زێده‌گاڤی ل سنۆرێ قه‌زا زاخۆ هاتینه راكرن
ل باژێرێ زاخۆ، د ماوه‌یێ سالێن ده‌ربازبوویی دا، گه‌له‌ك سه‌رپێچی و زێده‌گاڤی ل سه‌ر زه‌ڤیێن میری و كاره‌ب و ئاڤ و شۆشته‌یێن ناڤ باژێریدا هاتینه كرن و به‌ڕه‌لاییه‌كا زۆر د ئیدارا خۆجهی یا باژێرێ زاخۆدا هه‌بوویه، لێ د ماوه‌یێ سالا بۆری دا، خۆشبه‌ختانه ب شێوه‌یه‌كێ یاسایی یێ پرۆفێشنال به‌رهنگاریا ڤان زێده‌گاڤییان هاتیه كرن.
مشیر به‌شیر، قائیمقامێ قه‌زا زاخۆ بۆ رۆژناما ئه‌ڤرۆ دیار كر، د ماوه‌یێ ساله‌كێ دا قایمه‌قامیا زاخۆ شیایه 2658 زێده‌گاڤییان ل سنۆرێ قه‌زا زاخۆ ڕاكه‌ت و رێگریێ ل ئه‌نجامدانا وان بكه‌ت كو ژ وان 1486 زێده‌گاڤی ل سه‌ر هێلا كاره‌با گشتی بوویه و كاره‌با سه‌رپێچی هاتیه بڕین بێ فه‌رق و جوداهی دناڤبه‌را وه‌لاتیان دا و گۆت: 900 زێده‌گاڤی ژی ل سه‌ر هێلێن ئاڤا ڤه‌خوارنێ هاتبوونه كرن و هه‌می هێلێن ب زێده‌گاڤی هاتینه راكێشان هاتینه بڕین و 171 زێده‌گاڤی ل سه‌ر سنۆرێ باژێرڤانیا زاخۆ هاتینه كرن وه‌كو ئاڤاهی و گۆڤ و سیمكرنا زه‌ڤی كو هه‌می ژی هاتینه راكرن و خرابكرن، هه‌ر دیسان 101 زێده‌گاڤی وه‌كو ئاڤاهی و گۆڤ و سیمكرنا زه‌ڤی ل سه‌ر سنۆرێ ناحیێن سه‌ر ب قه‌زا زاخۆڤه هاتینه خرابكرن.
زێده‌تر گۆت: هه‌تا رادده‌یه‌كا گه‌له‌ك باش كونترۆلا ناڤ بازاری هاتیه كرن كو د ساله‌كی دا وان شیاینه ده‌ست ب سه‌ر ٢٧٥ ته‌نێن كه‌لوپه‌ل و ئاهێن خوارنێ یێن ئێكسپایه‌ر دا بگریت و ژناڤ ببت، ژ به‌ر كو كاریگه‌رییه‌كا گه‌له‌ك خراب ل سه‌ر ره‌وشا ساخله‌میا خه‌لكێ ده‌ڤه‌رێ په‌یدا دكه‌ت و ب هیچ ره‌نگه‌كی لێبوورین بۆ ڤی بابه‌تی نه‌بوویه و هه‌ر كه‌لوپه‌له‌ك هاتیه گرتن ل گۆره‌ی یاسایێ سه‌ره‌ده‌ری دگه‌لدا هاتیه كرن.
خویاژی كر، د ماوه‌یێ ساله‌كێ دا شیاینه 15100 سه‌ره‌دانان ب رێكا لیژنه‌یێن دیڤچوونێ یێن قایمه‌قامیا زاخۆ ئه‌نجام بده‌ن و د ڤی ماوه‌یی دا 153 جهێن كاری ژبه‌ر نه‌پێگیریكرنا وان ب رێنما و یاسایێ ژ لایێ وانڤه هاتینه داخستن و 158 جهێن كاری ژی هاتینه سزادان، ژ به‌ر كو پێگیری ب رێنمایان نه‌بووینه و ب بهایێ 60 ملیون دیناران د ساله‌كێ دا هاتینه سزادان.
