مه‌سروور بارزانى: شۆره‌شا گولانێ خه‌ونا دوژمنان بۆ نه‌هێلانا كوردستانێ ژناڤبر
ده‌قێ په‌یاما مه‌سروور بارزانى ب هه‌لكه‌فتا سالیادا شۆره‌شا گولانێ:ب هه‌لكه‌ڤتا چل و شه‌شه‌مین سالیادا ده‌ستپێكرنا شۆره‌شا گولانێ، گه‌رمترین پیرۆزباهییان ئاراسته‌ى جه‌نابێ سه‌رۆك مه‌سعوود بارزانى و پێشمه‌رگێن قه‌هره‌مان و پشكدارێن شۆره‌شێ و كه‌سوكارێن سه‌ربلندێن شه‌هیدان دكه‌م. شۆره‌شا گولانێ وه‌ك درێژه‌پێده‌را شۆره‌شا ئه‌یلولێ، خه‌ونا دوژمنان بۆ نه‌هێلانا كوردستانێ ژناڤبر، بوویه په‌یامه‌كا ب هێز یا گه‌لێ كوردستانێ بوو كۆ سته‌م و داگیركارییێ ره‌ت دكه‌ت و چ جاران ده‌ستبه‌ردارى مافێن خۆه یێن ره‌وا نابیت. ل پێناڤى ڤێ چه‌ندێ ژى قوربانییێن مه‌زن دان و چه‌ندین داستان د دیرۆكا خه‌باتا گه‌لێ كورد دا تۆماركرن، ژ هه‌موویان دیارتر داستانا مێژوویى یا خواكورك بوو ب سه‌ركردایه‌تییا سه‌رۆك بارزانى. ئه‌ڤرۆ، د ده‌مه‌كیدا كۆ یادا سالڤه‌گه‌را شۆره‌شا گولانێ دكه‌ین، خه‌باتا گه‌لێ كوردستانێ ل پێناڤى پاراستن و به‌رگریكرنێ ل ده‌ستكه‌فت و سازیێن شه‌رعى یا به‌رده‌وامه و پێدڤى یه خه‌لكێ كوردستانێ ب هه‌موو لایه‌ن و پێكهاتێن خۆه ڤه داكۆكییێ ل مافێن خۆه یێن ده‌ستوورى بكه‌ت كۆ ب خوینا هزاران شه‌هیدان ب ده‌ستڤه هاتینه. ل سالیادا ده‌ستپێكرنا شۆره‌شا گولانێ، ب رێز ڤه یادا هه‌موو پێشمه‌رگێن قاره‌مان و پشكدارێن شۆره‌شێ دكه‌ین، ل سه‌رێ هه‌موویان ژى ئدریس بارزانى. درود بۆ گیانێ پاك یێ شه‌هیدێن شوره‌شا گۆلانێ و ته‌ڤایا شه‌هیدێن كۆردستانێ. مه‌سروور بارزانى26ى ئه‌یارا 2022
