پەیاما (توركا)….ب (زێدەهی)ڤە گەهشت
كوڤان حسێن
ئەڤا ل درامایەكا توركی دا بەرامبەری كوردستانێ هاتی پیشاندان، ژ راست تشتەك نوی نینە، بەلكو ئەڤە ناڤەرۆكا دیتن و بەرێخودانا هەمی تەخ (ئەنتلجێنسا) توركیە و پتری سەد سالایە كار لسەر هاتیە كرن، هەتا د مێشكێ تاكێ خودا ئەو چەندە دوپات بكەن كو كورد بتنێ هندەك درندە و عەشیرەتن ل چیا، ژ هەمی شارستانیەتەكێ ڤە قەتیاینە.
ئەڤ ناڤەروكا ڤێ درامایێ پیشاندای، هەمی روژێ كوردێن باكور ب چاڤ دبینن، ل دادگەھـ و سەرەدەریا دەولەتا توركیا دا. پەیاما ناڤ تەخەكا روناكبیرا توركیێ دا، ئەڤ هزرە مەرجێ نیشتمان و نەتەوە پەرستیێ یە بو توركیا كەمالیزمێ. لێ ئەڤە تەمامكەرا هێرشا دەراما ئیرانێ یە ژ بەری سالەكێ بۆ سەر هەرێمی و سەمبولێن وێ ژ ئالا و دادگەھـ، پیشمەرگە و سەروك. هەرێما كوردستانێ ب هەمی كێماسێن خوڤە ژلایێ ئیرانێ و توركیا ڤە ژ بلی زمانەكێ دبلوماسی لسەر هیچ ئاستەكێ دی، وەك راستی قبوول نینە و هەمی شاكارەكێ لڤێ هەرێمێ بۆ (كوردا زێدەیە).
ئاشكراتر، میدیا توركی و ئیرانێ ئاشكرا دبێژن ئەڤە دەولەتەكا دیفاكتویا ل كوردستانێ درست بوی ژ بەردەستێ وان دەركەفتیە و سەرەدەری دگەل ژ نەچارییە ب حكمێ جوگرافیایێ یە و هەمیێ ب هەبوونا ئەمریكا ڤە گرێدەن، ئانكو بۆ خوە ب تشتەك بەروەخت دیار دكەن. قەد تورك و فارس نەگەهشتنە وێ باوەریێ كوردا قبوول بكەن، وەك گەلەكێ سەربەخو. ئەڤا دكەن وەك سەرەدەری هەم ژ نەجاریە هەم بۆ بەرژەوەندیا هندەك سەردەستێن وانە. هەمی میدیا توركی و ئیرانێ چاڤێ وان ل سەر هندێ یە وێنەك خرابێ هەرێمی بۆ كوردێن خوە ڤەگێرن.
ئەما ناڤەروكا وێ سیناریویا سەقەتا فلمی دیار كری ژی، راست جهێ پێكەنینێ یە. هەبونا كوردستانێ و كوردا ب ڤێ سیناریویێ ب گومان ناكەڤیت. هەبونا كوردستانێ سەلماندییە لسەر تەقنە بەرێن سومەریا هەتا گرێگا و ئەڤە یێن تازە هاتنی ڤێری عەرەب و توركن. یا دی ئەم راهاتینە لسەر ڤێ دیتنا توركا، ئەڤە سەدان سالانە ڤێ بیردوزێ ب رێدكەن. هیج تشتەكێ ناگوهوریت. جارێ كوردستان هەبونەكا بەرجەستەیە. ژ منڤە پێدڤی ناكەتن سیاسیێن كورد ڤێ چەندێ نورمال نەوەرگرن. ئەڤە دیدەنێ توركایە و یێ هەمیان ژی ژ عەرب و فارسا لسەر ڤێ كوكن. باشترین بەرسڤ سەركەفتنا سەربورا كوردستانێ یە و كێمكرنا كێماسیا یە لسەر ئاستێ خزمەت و وەرارا ئاڤەدانیێ.
