سه‌رۆك بارزانی:پارتی بۆ هه‌موو خه‌لكێ كوردستانێ ئیراده‌ و هیڤی و هێزه‌

سه‌رۆك مه‌سعود بارزانی ب هه‌لكه‌فتا 76 سالیا دامه‌زراندنا پارتی دیموكراتی كوردستان په‌یامه‌ك به‌لاڤكر و تێدا راگه‌هاند، پێدڤیه‌ هه‌ر كه‌سه‌كێ پارتی بیت د ئاستێ مه‌زنیا دیرۆك و قوربانیدانا حزبا خوه‌ و خوینا شه‌هیدان بن و پێدڤیه‌ ئه‌ركێ خوه‌ ب باشترین شێوه‌ ئه‌نجام بده‌ ن كو خزمه‌تكرن و ب هێزكرنا كوردستانێ یه‌.

ده‌قێ په‌یاما سه‌رۆك بارزانی…

ب هه‌لكه‌فتا هاتنا 16 ئابێ و بیرئانینا 76 سالیا دامه‌زراندنا پارتی دیموكراتی كوردستان، گه‌رمترین پیرۆزباهیان ل مالباتێن سه‌ربلندێن شه‌هید و پێشمه‌رگێن قه‌هره‌مان و هه‌موو كادر و لایه‌نگر و جه‌ماوه‌رێ پارتی و تێكرایێ خه‌لكێ كوردستانێ دكه‌م.

ب هه‌لكه‌فتا 16 ئاب دا په‌یاما من بۆ جه‌ماوه‌ر و لایه‌نگر و ئه‌ندامێن پارتی ئه‌وه‌ كو پارتی حزبا دۆز و بهایانه‌ و شوینكه‌فتا رێبازا بارزانیێ نه‌مر و جهێ ئومێدا خه‌لكێ كوردستانێ یه‌. له‌وما پێدڤیه‌ هه‌موو ئه‌ندامێن پارتی دئاستێ مه‌زنیا دیرۆك و قوربانیدانا حزبا خوه‌ و خوینا شه‌هیدان بن و پێدڤیه‌ ئه‌ركێ ب باشترین شێوه‌ ئه‌نجام بده‌ن كو خزمه‌تكرن و ب هێزكرنا كوردستانێ یه‌. داخوازێ ژ هه‌موو ئه‌ندامێن پارتی دكه‌م ئیراده‌ و هیڤیا وان یا ب هێز بیت چونكه‌، پارتی ئیراده‌ و هیڤی و هێزه‌ بۆ هه‌موو خه‌لكێ كوردستانێ.