به‌ری هاتنا وه‌رزێ زڤستانێ شوقه‌یێن كرێداران دێ هێنه ئاڤاكرن
سه‌رۆكێ ده‌سته‌یا وه‌به‌رهێنانێ ل هه‌رێما كوردستانێ راگه‌هاند، بزاڤ دهێنه كرن به‌ری هاتنا وه‌رزێ زڤستانێ پڕۆژێ ئاڤاكرنا شوقه‌یێن كرێداران بكه‌ڤیته د بیاڤێ بجهئینانێ دا و دبێژیت: نوكه كار ل سه‌ر ڤاڤارتنا ناڤێن كرێداران دهێته كرن.
دكتۆر محه‌مه‌د شوكری، سه‌رۆكێ ده‌سته‌یا وه‌به‌رهێنانێ دوهی 23/8/2022 د كۆنگره‌یه‌كێ رۆژنامه‌ڤانی دا دیار كر، ئیداره‌یێن پارێزگه‌هان هاتینه راسپاردن بۆ ڤاڤارتنا ناڤێن وان وه‌لاتیێن فۆرمێن وه‌رگرتنا شوقه‌یان تژیكرین و گۆت: “بڕیاره هه‌موو بهێنه ڤاڤارتن، به‌ری نوكه وه‌ربه‌رهێنه‌ر هاتینه گازیكرن بۆ ده‌سته‌یا وه‌به‌رهێنانێ هه‌تا پێشنیارێن خوه ل دۆر ئاڤاكرنا شوقه‌یێن كرێداران بده‌نه ده‌سته‌یا وه‌به‌رهێنانێ”.
دكتۆر محه‌مه‌د شوكری گۆت: “هه‌موو بزاڤ دهێنه كرن د ده‌مه‌كێ زوو دا ده‌ست ب ئاڤاكرنا پڕۆژێ شوقه‌یێن كێم ده‌رامه‌تان بهێته كرن، مه ل به‌ره به‌ری هاتنا وه‌رزێ زڤستانێ و بارانێ ده‌ست بجهئینانا شوقه‌یان بكه‌ین، داكو د ده‌مه‌كێ زوو دا ئه‌و 20 هزار شوقه بهێنه ته‌مامكرن و ل سه‌ر كرێداران بهێنه به‌لاڤكرن، بێگومان ل گوره‌ی پلانا حوكمه‌تێ ژی سێ جۆرێن شوقا دێ هێنه ئاڤاكرن ب رووبه‌رێن 80 مه‌تری و 100 مه‌تری و 120 مه‌تری”.
