وه‌زاره‌تا خواندنا بلند راگه‌هاند، مه‌ پێدڤى ب زێده‌ترى پێنج ملیار و نیڤ ژ دیناران هه‌یه‌ بۆ پێدانا شایسته‌یێن دارایێن قوتابیان

د كتور توانا نه‌جه‌ف، رێڤه‌به‌رێ گشتى یێ دیوانا وه‌زاره‌تا خواندنا بلند و ڤه‌كولینێن زانستى راگه‌هاند، وه‌زاره‌تا خواندنا بلند مه‌هانه‌ بكێمى ڤه‌ پێدڤى ب پێنج ملیار و شه‌ش سه‌د ملیون دیناران هه‌یه‌ بۆ پێدانا شایسته‌یێن دارایێن قوتابیێن زانكو و په‌یمانگه‌هان و ناڤبرى گوت ژى، ل سالا دوو هه‌زار و چواردێ پێدانا شایسته‌یێن قوتابیان هاتبوو راوه‌ستاندن و ب خوه‌شحالى ڤه‌ بۆ سالا دووێ كابینه‌یا نه‌هێ یا حكومه‌تا هه‌رێما كوردستانێ ده‌ست ب دابه‌شكرنێ كریه‌ و دایه‌زانین ژى ب هه‌ر ره‌نگه‌كێ هه‌بیت سه‌رجه‌م قوتابیان پشتراست دكن كو خه‌رجیێن چو مه‌هه‌كێ نا ئێنه‌ سوتن
نه‌وزاد شێخ كامل، رێڤه‌به‌رێ گشتى ل وه‌زاره‌تا بازرگانى و پێشه‌سازییا حكومه‌تا هه‌رێما كوردستانێ راگه‌هاند، ئێك ژ خالێن كارنامه‌یا كابینه‌یا نه‌هێ یا حكومه‌تا هه‌رێمێ هه‌مه‌جوركرنا داهاتى بوویه‌ و، بۆ ڤێ مه‌ره‌مێ گرنگى ب كه‌رتێ چاندنێ و پێشه‌سازى و گه‌شتیارى و بازرگانى د ئێته‌ دان و ناڤبرى دیاركر ژى، ژ پێخه‌مه‌ت پێشڤه‌برنا كه‌رتێ پێشه‌سازى ب ده‌هان كونگره‌ و گونفره‌نس و سمینار هاتینه‌ رێكئێخستن و، هه‌روه‌سا بوچوون و داخوازیێن چه‌ندین خودان كاران ژى لسه‌ر هه‌مان بابه‌ت هاتینه‌ وه‌رگرتن و ناڤبرى دا زانین ژى، پرۆژه‌ هاتیه‌ ده‌ستپێكرن داكو پشته‌ڤانیا خودان پرۆژه‌یێن پێشه‌سازى بێته‌ كرن و ب كێمكرنا كریا كاره‌بێ و لێبوورینا گومركێ بۆ وان كه‌لوپه‌لێن د ئێنه‌ هاورده‌ كرن و چه‌ندین داخوازیێن دیتر ژى هه‌نه‌ وه‌ك پشته‌ڤانى بو كه‌رتێ ناڤبرى دێ ئێنه‌ ب جهئینان