ئێكه‌م كومبوونا جڤانا وه‌زیران ب سه‌رپه‌رشتیا مه‌سروور بارزانى و به‌شداربوونا تیما ئێكه‌تیێ دێ برێڤه‌چیت

پشتى كومبوونا هه‌شتى ڤێ مه‌هێ یا دناڤبه‌را مه‌سروور بارزانى سه‌رۆك وه‌زیرێن هه‌رێما كوردستانێ و قوباد تاله‌بانى جێگرێ سه‌رۆك وه‌زیران دا بریاره‌ سوباهى لرۆژا ئێك شه‌مبیێ كومبوونا جڤانا وه‌زیران ب به‌شداربوونا قوباد تاله‌بانى و تیما ئێكه‌تیێ برێڤه‌بچیت و، لدویڤ زانیاریان ئێكه‌تى دخوازیت رێككه‌فتنا پێنجى و حه‌فت ژ سه‌دێ به‌رامبه‌ر چل و سێ ژ سه‌دێ یا پركرنا كورتئینانا مووچه‌یى یا دناڤبه‌را پارێزگه‌هان دا نه‌مینت و داهاتێ نه‌فتێ و ناڤخۆ هه‌مى بێته‌ كومكرن و دابه‌شكرن و، دئێته‌ چاڤه‌رێكرن رێككه‌فتنا دناڤبه‌را پارتى و ئێكه‌تیێ دا ل په‌رله‌مانێ كوردستانێ بێته‌ كاراكرن و گوتوبێژ بۆ برێڤه‌چوونا هه‌لبژارتنان ده‌ستپێبكه‌ن، ئه‌ڤه‌ دده‌مه‌كێ دایه‌ سه‌رۆك بارزانى د رێوره‌سمێن ڤه‌كرنا یادگه‌یا نیشتیمانى یا بارزانى دگوتاره‌كێ دا داخوازییه‌ك ئاراسته‌یى لایه‌نێن سیاسى كر و گوت ل ڤێرێ ب ده‌لیڤه‌ دزانم بانگه‌وازه‌كا دلسۆزانه‌ ئاراسته‌یى هه‌مى لایه‌نێن سیاسى یێن هه‌رێما كوردستانێ بكه‌م كو لاپه‌ره‌كێ نوى ڤه‌كه‌ن و، داخوازكارم هه‌ر چ زویتره‌ كومبوونه‌كا به‌رفره‌ه به‌ریا هه‌ژده‌یى ڤێ مه‌هێ بێته‌كرن وێ چه‌ندێ دلسۆزانه‌ و به‌رپرسیارانه‌ و كوردستانیان به‌حسێ هه‌مى كێشه‌یان بێته‌كرن و چاره‌سه‌ر بكه‌ن