بەرپرسێ لقێ ٨ێ پارتی سەرەدانا قەیمەقامیا قەزا باتیفا کر
بەرێز عومەر ئۆرەیی بەرپرسێ لقێ ٨ێ پارتی دیموکراتی کوردستان ل زاخۆ، ب یاوەریا شاندەکێ کارگێریا لقێ هەشت سەرەدانا قایمەقامیا قەزا باتیفا سەر ب ئیدارا سەربەخۆیا زاخۆڤە کر و ژ لایێ بەرێز فەرهاد محموود قایمەقامێ باتیفاڤە پێشوازی ل شاندێ لقێ هەشت هاتەکرن.
بەرپرسێ لقێ ٨ێ پارتی دیموکراتی کوردستان ل زاخۆ دگەل قایمەقامێ باتیفا باس ل رەوشا خزمەتگوزاریێن باتیفا کر و خۆیاکر کو خەلکێ قەزا باتیفا ژ هەژینە خزمەت بۆ بهێنە کرن ژبەرکو خەلکێ وێ هەر بگرە ژ سەردەمێ شورەشێن کوردی تا نوکە ژی قوربانیێن زۆر د پێناڤا پاراستنا کورد و کوردستانێدا داینە و هەر چ تشتێ پێتڤییە ئەم وەکو پارتی دیموکراتی کوردستان ب رێکا ئیدارا سەربەخۆیا زاخۆ و قایمەقامیا قەزا باتیفا ڤە دێ بۆ خەلکێ دەڤەرێ ب سوپاسیڤە ئەنجامدەین و هەر خزمەتەکا بکەین ژی ئەرکێ مەیە و دێ بەردەوام بین و ناکەینە منەت، چونکی ب راستی ژی خەلکێ باتیفا دلسۆزن بەرامبەر ئاخ و نیشتمان و نەتەوەیا خوە و خزمەتکرنا خەلکێ وێ بۆ مە سەربلندییە.
بەرێز عومەر ئۆرەیی ئەو ژی خۆیاکر کو د پرۆگرامێ حکۆمەتا مە دا هەیە هژمارەکا پرۆژەیێن گرنگ ل باتیفا بهێنە بجهئینان د وارێ ساخلەمیێ و رێک و جاددەیان و گەشت و گۆزار و چەندین کەرتێن گرنگ یێن گرێدایی ژیانا خەلکێ مە و گۆت ژی: بۆ خۆرتکرن و پێشڤەبرنا کەرتێ گەشتیاری ل قەزا باتیفا هەر چ پێتڤییە ئەم وەکو پارتی د بەرهەڤین و گرنگیدان ب باتیفا دێ بیتە ئەگەر کو گەنجێن دەڤەرێ ژی دەلیڤەیێن کاری پەیدا بکەن ددەمەکی دا کو پتر ژ ١٥ جهێن گرنگ یێن شینواری یێن دیرۆکی تێدا هەنە و زێدەتری ٥٠ جهێن گەشتیاری.
