نووچه
بەرێز عومەر ئۆرەیی: داستانا خواکورکێ سەرکەفتنا ئیڕادەیا گەلێ کورد و پێشمەرگەیێن چاڤنەترس و قارەمان بوویە
پێش ۳٦ سالان و ل رۆژا ٥ی ئیلۆنا ١٩٨٨ێ، پشتی ٤٦ رۆژێن خۆڕاگری و بەڕەڤانییەکا دژوار یا پێشمەرگەیێن قارەمان، داستانا خواکورکێ ب سەرۆکایەتیا سەرۆک مەسعود بارزانی د دیرۆکا بزاڤا رزگاریخوازا کوردیدا هاتە تۆمار کرن و پێشمەرگەیێن جانفیدا دوژمنێ کوردان نەچارکر پاشڤە بچیت و هێزا پێشمەرگەیێن کوردستانێ شیان عەرشێ سوپایێ عێراقێ ل وی دەمی ب هەژینیت کو ئەو سوپایە ب پێنجەمین سوپایێ جیهانێ دهاتە هژمارتن.
سوپایێ عێراقێ ل ١٩ی تەمووزا سالا ١٩٨٨ێ ھێرشەکا بەرفرەهـ بۆ دەڤەرێن رزگارکری یێن شۆڕەشا کوردستانێ ل دەڤەرا خواکورک دەست پێکر. د وی شەڕی دا سوپایێ ڕژێما بەعس ب بەشداریا زێدەتر ژ دوو فەیلەق و پازدە لیوایێن سەربازیی، ۳٠ فەوجێن جاشان و تۆپخانە و چەکێ قورس و فڕۆکەیێن جەنگيی ب گرانی شەرێ پێشمەرگەیی کر، هەتاکو چەکێ کیمیاوی ژی تێدا بکارئینا لێ پێشمەرگەیان ب سەرۆکایەتیا سەرۆک بارزانی شیان زیانەکا ئێکجار زۆر بگەهیننە رژێما بەعس و وانەیەکا دیرۆکی دایە وان کو شەرێ ئیرادە و خۆڕاگری و قوربانیدانا کوردان ژ ھەمی چەکێن وان ب هێزتر و کاریگەرترە.
داستانا خواکورکێ بوویە هەڤێنێ سەرهلدانا مەزن یا گەلێ کورد ل ئادارا سالا ۱۹۹۱ێ و کوردستانا نوکە ئەم تێدا دژین بەرهەمێ وێ خۆڕاگریا مللەتێ مەیە و د ڤێ یادێ دا؛ سەرێ خوە بۆ شەهیدێن داستانا خواکورک و تەڤایا شه‌هيدێن رێکا رزگاریا کوردستانێ و سەرکاروانێ وان بارزانیێ نەمر و کاک ئیدریسێ جانەمەرگ د چەمینین.
عومەر ئۆرەیی
بەرپرسێ لقێ ۸ێ پارتی دیموکراتی کوردستان ل زاخۆ
۲٠۲٤/۹/٤
