نووچه
بەرێز عومەر ئۆرەیی: کاک ئیدریس بارزانی وه‌كو بیرمه‌نده‌كێ مه‌زن ب دونیادیتنه‌كا سه‌رده‌میانه كار ژبۆ پێشڤه‌‌برنا پرسا كورد و خورتكرنا خه‌باتا نه‌ته‌وایه‌تی كرییه
پێش ٣٨ سالان ل رێکەفتی (٣١/١/١٩٨٧)ێ، سیاسەتڤان و سەرکردەیێ شۆرەشگێر ئیدریس بارزانی مالئاڤاهی ل کوردو کوردستانێ کر. ب وه‌غه‌را دوماهیێ یا ئیدریس بارزانی؛ بزاڤا كوردایه‌تیێ ل سه‌ر ئاستێ كوردستانا مه‌زن سه‌كرده‌یه‌كێ خودان ئه‌زموون دبیاڤا خه‌باتا شوره‌شگێری و سیاسەتڤانه‌كێ هوشیار و لێزان و دویربین دبیاڤێ خه‌باتا سیاسی و دیپلوماسیدا ژ ده‌ستدا.
کاک ئیدریس بارزانی کو ل سه‌ر ده‌ستێ بارزانیێ نه‌مر ب بیروباوه‌رێن ئازادیخوازی و كوردایه‌تیێ هاتبی په‌روه‌ردەكرن کو سیاسەتڤانەکێ هوشیار و دویربین و خودان هزر بی و هه‌می ده‌ما وه‌كو بیرمه‌نده‌كێ مه‌زن ب دیتن و دونیادیتنه‌كا سه‌رده‌میانه كار ژبۆ به‌ره‌ف پێشڤه‌‌برنا پرسا كورد و خورتكرنا خه‌باتا نه‌ته‌وایه‌تی كرییه.
خۆدێ ژێ ڕازی ئیدریس بارزانی ب تێگه‌هشتنەکا لوژیكی و ب فه‌لسه‌فا هزری و ب پشته‌ڤانیا سه‌رۆك مه‌سعود بارزانی؛ به‌رده‌وام كار بۆ وێ چه‌ندێ دكر کو هێز و شیانێن كوردان د ئێك چه‌په‌ر دا ژ پێخه‌مه‌ت خورتكرنا خه‌باتا نه‌ته‌وه‌‌یی كومڤه‌بكه‌ت و دەستکەفتێن زێڕین ژی د ڤی واری دا ژبۆ گەلێ کورد دەستڤەهیناتینە و ژبەر ڤێ چەندێ ژی سەرۆک بارزانی د وەسفا کاک ئیدریس بارزانی دا دبێژیت: کاک ئیدریس وێنەیەکێ پاک و بێگەردێ بارزانی نەمر بی، هەمی سیفاتێن وی ل دەف وی کۆم ببین)
د ڤێ یادا خەمناکدا، سەرێ رێز و حورمەتێ بۆ گیانێ کاک ئیدریس یێ پیرۆز و هەمی شەهیدێن کوردستانێ و سەرکاروانێ وان بارزانیێ نەمر د چەمینین.
عومەر ئۆرەیی
بەرپرسێ لقێ ۸ێ پارتی دیموکراتی کوردستان
۲٠۲٥/۱/٣٠
