پەیاما لقێ ۸ێ پارتی دیموکراتی کوردستان ل دۆر دەربازبوونا ۳٥ سالان ب سەر ئەنفالێن رەشێن بادینان
ئەڤرۆ، ۳٥ سال ب سەر ئەنجامدانا هەوا ئەنفالێن رەش دەرباز دبیت کو ئەنفال ژ لایێ رژێما بەعسڤە ل دژی گەلێ کورد د ۸ قوناغێن دژوار ڕا دەربازبی و قوناغا هەشتێ یا ئەنفالێ ل دەڤەرا بەهدینان بوویە ل دەڤەرێن پارێزگەها دهۆك و میسل و سنۆرێ ئیدارا سەربەخۆیا زاخۆ کو ئەنفال ژ لایێ لەشکەر و چەکدار و دویڤه‌لانكێن رژێما بەعس ڤە ل عیراقێ هاتە ئەنجامدان، و هەمی دەڤەرێن کوردان ڤەگرت، و گوندێن وێ هاتنە سوتن و وێرانکرن، و پشكه‌ك ژ خەلکێ وێ هاتنە گرتن و بەرزەکرن و شەهیدکرن، و ب ساخی هاتنە بن ئاخکرن د گوڕێن ب کوم دا ل بیابانا ژێریا عیراقێ، و پشكه‌کا دی پشتى لێبورینا گشتى خوە ڕادەستی حکومەتا عیراقێ کرن لێ هەمی برنە کەلهێن نزارکێ، پاشی ڤەگوهاستنە جهێن دەستەسەرکرنێ ل بەحرکێ و جەژنەکان، وگردەچال ل نێزیك هەولێرێ و هەمی جۆرێن کۆشتن و زۆلم و ئەشکەنجەدانێ دگەل واندا هاتنە بکارئینان.
ئەنفالێن کو ل رۆژا ۲٥/۸/۱۹۸۸ێ دەستپێکری و ل رۆژا ٦/۹/۱۹۸۸ێ ب دوماهی هاتی و تێدا نزیک ٤٥٠٠ گوندێن کوردستانێ هاتینە سوتن و خراپکرن و ۱۸۲ هزار کەس ژ کوردێن موسلمان، ئێزدی و مەسیحی ب هۆڤانە هاتینە کۆشتن و بن ئاخکرن و ب هزاران کورد هاتینە راگوازتن و سەرهنداکرن و دەربەدەری وەلاتێن تورکیا و ئیرانێ بووین و گیانێ خوە و زارۆکێن خوە خلاس کرین و ل کەمپێن (مۆش، دیاربەکر، مێردین، قزل تەپە) هاتینە بنچاڤکرن؛ چ جاران ئەڤ ئەنفالە ژبیرا مە ناچیت و دێ د مێشکێ مەدا هەردەم ل یاد بیت.
رژێمێن شوڤینی هەمی رێک و شێوازێن قرکرنێ و ژناڤبرنێ ل هەمبەر گەلێ کورد بکار ئیناینە لێ کیمیابارانکرن و ئەنفالکرن گوپیتكا ھوڤاتیێ و دڕندایەتیا وان رژێمان بوویە بۆ هندێ کوردان بێدەنگ بکن، لێ هیچ جارەکی گەلێ کورد بێ ئومێد نەبوویە، بەروڤاژی رژدتر و خوراگرتر بوویە ب درێژەپێدانا خەباتا خوه هەتا سەرھلدان و ئازادیا ئەڤرۆ یا ھەرێما کوردستانێ.
ئەم وەکو پارتی دیموکراتی کوردستان پێداگیرییێ دکەین کو ھەمی بزاڤ بھێنە کرن ژ پێخەمەت قەرەبووکرنا مالباتێن ئەنفالبوویی ژ لایێ عێراقێ ڤە و ڤەگەراندنا گورێن قوربانیێن ئەنفالێن بادینان ب ھەژیترین شێوە ل ئاخا کوردستانێ بھێنە شاد کرن ب مێنومێنت، و درندایەتیا ڤێ تاوانێ وەک خالەکا رەش د دیروکا دوژمنێن گەلێ مەدا بھێتە تۆمارکرن و ببیتە وانەیەکا دیروکی بۆ زاروکێن گەلێ مە.
سەربەرزی بۆ گیانێ شەھید و قوربانیێن ئەنفالێن بەھدینان و تەڤایا شەھیدێن رێیا ئازادی و رزگاریخوازا کورد و کوردستانێ
لقێ ۸/ زاخۆ
پارتی دیموکراتی کوردستان
۲٥/۸/۲٠۲۳
