ئەڤرۆ بیروەریا سێدارەدانا پێشه‌وا قازی محەمەدە
ئەڤرۆ 71 سال ل سەر سێدارەدانا پێشەوا قازی محەمەد سەرکردەیێ کورد و سەرۆکێ کۆمارا کوردستان ل مھابادێ دەرباز دبن.
قازی محەمەد د رۆژەکا وەکو ئەڤرۆ دا و ل سالا ھ1947 ل مەیدانا چار چرا مھابادێ ژ ئالیێ دەستھەلاتا ئیرانێ ڤە حوکمێ سێدارێ ل سەر ھات بجھئینان، پشتی دادگەھا سەربازی بۆ ھاتییە کرن.
پێشەوا قاز محەمەد ل بیست و دوێ کانوونا دوێ یا سالا ھزار و نەھسەد و چل و شەشێ، بەرێ بنیاتێ ئێکەم کۆمارا کوردی ب ناڤێ کۆمارا کوردستان ل مھابادێ دانا.
لاوازییا دەستھەلاتا تەھرانێ ل وی سەردەمی و ھەبوونا ھێزێن ئێکەتییا سۆڤیێت ل سەر خاکا ئیرانێ کو پشتەڤانی و مەشقا ھێزێن کوردی دکرن، 2 ئەگەر بوون، کو رێ ژبۆ راگەھاندنا کۆمارا کوردستان خۆش کری، قازی محەمەد ل 22ێ کانوونا دویێ کۆمار راگەھاند و ئەو وەک سەرۆکێ وێ ھات دەستنیشان کرن.
حکومەتا ئیرانێ ل کانوونا ئێکێ یا ھەمان سالێ، ئۆپەراسیۆنەکا سەربازی دەست پێ کر، پشتی ھێزێن سۆڤیێت ژ ئیرانێ ھاتینە ڤەکێشان، و شیان بگەھنە مھابادێ و کۆمارا کوردستانێ ژناڤببەن.
پێشەوا قازی محەمەد ب ئێکەم سەرۆککۆمارێ کورد دھێت ناسین کو وەسیەتا ئێکگرتنێ ئاراستەی گەلێ کورد کری، ھەڤدەم پاراستنا وەلاتی ئەمانەتی بارزانیێ نەمر کر بوو.
پێشەوا قازی محەمەد د وەسیەتنامەیا خوە دا داخواز ژ گەلێ کوردستانێ کربوو، ئێکگرتی بن و دەست ژ دوژمنکارییا ھەڤدو بەردەن، ھەروەھا ل بەرانبەر دوژمنێ زۆردار ژی یەک دەنگ راوەستن.
قازی محەمەد ژ گەلێ کوردستانێ خواستبوو، باوەریێ ب غەیری خوە نەکەن و بەرژەوەندیێن گشتی نەکەنە قوربانی بەرژەوەندیێن تاکە کەسی.
ئەڤرۆ 31ی ئادارێ 71 سال ل سەر سێدارەدانا وی دەرباز دبن کو ل سپێدەھییا 31ی ئادارا سالا 1947 ھاتبوو سێدارەدان.
