پێنچ رێک دێ بۆ هێزێن پێشمەرگەی هێنە ڤەکرن
عەلی حاجی :
رێڤەبەرێ سەخبێریا رێک و پران ل پارێزگەها دهوکێ دیار کر ل ل دووڤ فەرمانا پارێزگەرێ دهوکێ ل دەڤەرێن سنوری ل زاخۆ رابووینە ب دروستکرنا رێکان ل هندەک جهێن ئاسێ بۆ هێزێن پێشمەرگەیێن کوردستانێ کو بریارە ساترێن خوە داننە وان جهان.
زێدەتر ئەندازیارێ شارەزا دێوالی حەمێ گۆت: (پشتی جەنابێ پارێزگەرێ دهوکێ داخواز ژ مە کری ب رێیا ئامیرەیین خوە چەند رێیەکان ل سنورێ ناحیێن دەرکارێ و باتیفا دروست بکەین ل دەڤەرێن چیایی، ماوەیێ حەفتیەکی یە وەکو رێڤەبەریا سەخبێریا رێک و پران ل پارێزگەها دهوکێ ب رێیا ئامیرەیێن خوە رابووینە ب دروست کرنا چەند رێیەکان ب تایبەتی ل دەڤەرا شەرانشێ یا سەر ب ناحیا دەرکارێ ڤە و پشتی ئەو رێکە دهێنە ڤەکرن بریارە هێزێن پێشمەرگەیی سەنگەرێن خوە ل وان جهان بدانن، هەر چەندە ژ جهێن گەلەک زەحمەت و ئاسێ نە بەردەوام ئامیرەیێن وان بەردەوامن ل سەر کار کرنێ هەتا کو بشێن وان رێکان ب دروستی ڤەکەن).
ناڤبری ئەو چەندە ژی گۆت: (پشتی ل شەرانشێ ئەو رێک ب دووماهی دهێت بریارە دەست ب ڤەکرنا هندەک رێکێن دیتر ژی بکەین ل دەڤەرێن بلند و چیایی ل ناحیا باتیفا و ئەڤ چەندە ژی ل دووڤ داخوازا هێزێن پێشمەرگەیێن کوردستانێ بوویە کو وان ب رێیا پارێزگەرێ دهوکێ ئەڤ داخوازە کریە و ب هێڤی نە د زووترین دەم دا ئەو رێکە هەمی بهێنە ڤەکرن دا کو بکەڤنە د خزمەتا هێزێن پێشمەرگەیێ کوردستانێ دا.
